Trahadornan di Serlimar a ricibi un carta interino caminda ta splica e situacion di e compania. Director sr. Anko Koopmans ta bisa cu e carta ta pa informa tur trahado di tur reunion cu tabatin cu sindicatonan y pa duna empleadonan ‘feedback’.
Segun sr. Koopmans ta purba pa cada luna duna algun informacion na trahadornan mirando cu situacion di e compania ta uno percario. E ta comparti cu tin e sentimento cu hende no ta tuma e situacion na serio caminda mester sigui baha gasto y keda paga trahado.
Sinembargo e ta bisa cu a tuma nota di e begroting supletario di 6.5 miyon cu a discuti den reunion di parlamento. E ta bisa cu e fondo aki por wanta pa e dos ultimo luna di aña pa por sigui biba manera Serlimar.
Sr. Koopmans ta bisa cu ta keda tin combersacion y cu mester keda traha hunto pa saca e compania di e problema cu tin. E ta bisa cu lo ta bon si obtene e 6.5 miyon di gobierno pa asina por sigui cubri e gastonan pa un temporada.
Un otro punto cu sr. Koopmans a menciona ta cu entrada di luna pasa a wak un crecemento di hende cu a cuminsa paga, pero a tuma nota cu e luna aki el a bolbe cay.Di parti Serlimar lo sigui manda recordatorio pa asina por keda haya nan entrada pa e compania por sobrebibi.
E ta comparti cu mester bin un cambio den ley caminda ta bisa cu den un reunion cu prome minister Evelyn Wever- Croes (kende tin e cartera actualmente di ex minister Marisol Lopez-Tromp) traha riba e ley aki pa bin cu un cambio caminda e consumidor ta cumpli cu su pago y responsabilidad ‘pa e paga cu e servicio cu e compania ta brinda’.
“Serlimar ta trahando pa baha gasto, ta keda busca solucion structural pa e compania. Tambe pa busca un solucion pa locual ta trata e problema di Parkietenbos”, sr. Koopmans a comparti.