Director di Post Aruba a celebra 35 aña den servicio

Diaranson, 14 di augustus, Post Aruba a celebra e hubileo di su Director Sr. Guillermo Raymond kende dia 2 di augustus ultimo a cumpli 35 aña den servicio.
E celebracion aki a tuma lugar na Peanuts Restaurant, na unda Su Excelencia Minister Chris Romero hunto cu famia di director, algun ex-colega y invitado special a uni cu e staf di Post Aruba pa celebra e ocasion special aki.
Alabes tur empleado di Post Aruba a ricibi un treat for di e director.

Durante e celebracion aki e ex-coleganan postal y Su Excelencia Minister Chris Romero a dirigi algun palabra na Sr. Raymond.
Su Excelencia Minister Chris Romero, di parti gobierno y como Minister di Transporte, Comunicacion y Sector Primario a entrega Guillermo Raymond un regalo, felicitando y a gradiciendo e pa su 35 añanan di servicio y dedicacion na Post Aruba. Alabes Minister ta menciona cu “Nos ta den tempo moderno, media ta cambia pero nos tin planes grandi cu cambionan pa futuro cu lo beneficia post como tambe pais Aruba.”
Staff di Post Aruba tambe a entregue un plakkaat cu un bunita mensahe como gradicimento pa tur su dedicacion y logronan te cu e dia di awe.

Guillermo Raymond a drenta servicio postal dia 2 augustus 1984 como partido di carta, despues el a bay traha pa 4 aña den e posicion di loket. Un biaha mas el a haya un promocion y a bira Chef di Express Mail Services, introduciendo e servicio di EMS. Cu tempo el a bira Chef di e departamento di pakete di Post, despues Post Security cu tabata un departamento cu mester a cuida e servicio di Post, pa asina evita cu hendenan ta haci mal uzo di e servicio di Post. Guillermo Raymond a sigui progresa y a bira assistent di e Operation Manager y despues e mes a ocupa e funcion di Operations Manager. 7 aña pasa el a wordo nombra Director di Post Aruba N.V.
Durante e 35 aña nan aki, señor Raymond a gana conocemento extenso perteneciente na e funcion y structura operacional di un oficina di Post, incluyendo su posicion den e comunidad postal local y internacional.

Tempo el a cuminsa como cartero e tabata atendiendo MTS (Middelbaar Technische School). Ora Lago Oil Refinery a cera na 1986, no tabata tin hopi oportunidad pa trabou disponibel den e ramo di trabou den cual el a specialisa. Consecuentemente Raymond a keda cu su trabou na Oficina di Post y a realisa cu si e kier sali dilanti y crea un sistema di bida mas lucrativo y stabiel pa su mes y su famia, e lo mester traha y studia duro y compromete su mes pa logra su metanan. Esaki ta exactamente loke el a haci tambe.

E funcion di Director y principalmente den un compania manera Post, den cual e evolucion tecnologico a afecta e producto principal di e compania, ta un reto hopi grandi.
En bes di skirbi carta, awo tur hende ta manda e-mail of whatsapp y esey a causa cu e volumen di post a cay hopi. Pero mientras cu di un banda internet y tecnologia a haci daño na e companianan postal, el a habri algun oportunidad tambe. Un di e mercadonan nobo a bira e cumpramento online. Y señor Raymond tin vision y metanan grandi pa engrandece e servicio aki tanto na Aruba como e region Caribense.

Staff y personal di Post Aruba ta gradici nan Director pa su dedicacion durante e 35 añanan aki y ta desee hopi exito cu su retonan den futuro.

 

Comments

comments