Diadomingo ta habri cu un informacion for di KIA cu e preso Gerson GalsirioMartina di 38 aña naci na Corsow 13 di November 1980 a huy. Segun director di KIA Sr. Gino Winklaar, e persona aki tabata falta nuebe luna di condena y ta huy for di KIA awemainta. Pa loke ta e ora exacto y circunstancia di su huida ainda ta bou investigacion segun e director. Manera e informacion a drenta a bay over na e procedura interno pa haya sa tur detaye di su huida y mesora a alerta tur partner manera CEA y tambe coordinadornan di KIA, a tuma contacto mesora cu Minister di Husticia como tambe Cuerpo Policial Aruba unda e Korp Chef interino a haya tur informacion. Henter dia e comunicacion a sigui riba tur detaye cu KPA pa nan sa, kico ta trahando riba dje na KIA pa yuda busca e persona aki y pone bek tras di trali. Director di KIA ta pidi pa pueblo di Aruba yuda y si mira e persona of por tende unda e por ta pa yama tiplijn di Polis. Ta deber di KIA pa tene e persona den KIA, pero ta un deber colectivo di ful e pais pa logra haya nan ora nan logra sali afo. Pueblo por yama pa duna cualkier tip via e tiplijn di polis 11141. E fugitivo Gerson Martina ta un persona peligroso y mester tene cuenta cune y no bay haci nada bo mes pasobra e ta un persona basta peligroso. E investigacion interno ta continua pa haya sa tur detaye con e persona aki a logra yega na su libertad. Manera cu ta cla cu tur informacion lo raporta esaki na autoridadnan concerni y claro na Minister di Husticia pa e haya informacion di tur detaye di loke a pasa segun Director di KIA Sr. Gino Winklaar. Mester remarca cu cualkier ayudo brinda na dicho persona ta castigabel pa nos codigo penal. Articulo 2:146 ta papia si libera of yuda na liberacion di un persona cu tin castigo di prizon por haya castigo maximo di 4 aña di prizon. Segun hefe di CEA Sr. Ronny Geerman, nan tin e trabou di “buiten schildwacht” y durante un escape CEA tambe ta hunto cu KIA den investigacion. Sr. Geerman ta pidi un biaha mas si tin cualkier informacion yama e tiplijn di Polis 11141 y tene cuenta cu Gerson Galsirio Martina ta un persona peligroso.