E ta un persona “van de oude garde”, cu hopi aña di servicio y cerca di bay cu pensioen, pero Majoor John Maduro ta na mesun momento un persona cu ideanan hopi innovativo. E ta un profesional cu a contribui masha hopi na e “formatieplan” di KIA, cu a keda completa y ta bay den su fase di implementacion proximamente.
Director di KIA, Rocco Tjon a comparti su pensamento y palabranan di gratitud pa su colega valioso, kende a haci contribucionnan valioso den su 41 añanan den servicio di pais Aruba, tanto na Huis van Bewaring como na prizon KIA.
Majoor John Maduro a laga atras hopi idea y input cu a wordo incorpora den e formatieplan y ademas a percura pa despues cu e baha cu pensioen, su colega Majoor Teixeira ta “in the loop”, completamente envolvi y informa di tur loke ta concerni su funcion, tareanan y e bida di e populacion di KIA en general.
Rocco Tjon a expresa cu di un banda e ta contento cu Majoor Maduro ta bay cu un pensioen bon mereci, pero di otro banda e ta haya lamentabel cu como un persona cu a contribui hopi na e formatieplan, e mes no t’ey pa experencia e fase di implementacion. E plan ta inclui diferente proyecto cu Maduro a inicia.
Majoor Maduro a traha cu hopi dedicacion, semper profesional y e ta laga su colega kende el a inclui den tur decision y proyecto for di dia cu el a cuminsa traha cun’e completamente prepara pa e reto.
Korrectie Instituut Aruba, KIA a muda pa su localidad na Santo di Patia na San Nicolas dia 22 di September 1990, pues 26 aña pasa. E prizon tin un populacion di un maximo di 200 detenido, parti den detencion preventivo, seccion di hende muhe y seccion di hubentud. Na KIA tin mas of menos 180 empleado trahando 24 ora pa dia pa garantisa siguridad y atende cu e presonan den cuadro di e periodo cu nan mester sinta nan castigo cu e meta pa coregi nan erornan y sali atrobe como miho ciudadanonan pa nos pais.