Awe, diahuebs, 26 di Juli 2018 e hunta di comisario di ELMAR a tuma e decision di suspende e director di ELMAR pa un periodo di trinta (30) dia. E decision no tawata uno facil, pero si uno necesario mirando entre otro e diferente kehonan serio di mal maneho y iregularidadnan den e compania.
E kehonan di ‘secuestro’ cu a wordo haci recientemente na Landsrecherche y tambe e intrankilidad cu ta existi pa un tempo caba.
Mirando esaki, hunta di comisario a conclui cu un investigacion na e diferente keho y sospechonan ta necesario. E suspencion lo sirbi tambe como un tipo di ‘koel af periodo’ den cual ta spera di por trece trankilidad bek na Elmar y frena e discusion publico negativo tocante e director y tocante Elmar cu ta tumando lugar. Hunta di comisario mester a interveni pa asina por cumpli cu su responsabilidad manera duna door di statuten di Elmar.
Pa loke ta e investigacion na e director suspendi, esaki lo cuminsa de inmediato y lo mesteri wordo haci cu cautela y prudencia. P’esey, y den interes di Elmar (y e director mes), hunta di comisario lo abstene su mes di comentario despues di awe y durante henter e proceso di investigacion. E hunta ta pidi comprension pa cu esaki.