Despues di a inicia e trabounan den e area di Sero Pela, sigui pa Palm Beach y un djis tambe Bakval, director di Elmar N.V. ing. Robert Henriquez a duna di conoce cu ya tin mas di 2.500 punto di luz LED instala. E cifra aki ta consisti di puntonan nobo den bario, como tambe na puntonan existente manera esnan riba riba caminda grandi Sasaki. Esaki ing. Henriquez a duna di conoce na instalacion di e prome luz LED den bario di Palm Beach, na unda cu hunto cu Prome Minister Mike Eman, e tabata presente pa e momento importante aki pa bisiñanan den e bario. Cu instalacion di e prome luz LED den e bario, siguridad den e bario ta un realidad pa hopi ciudadano cu a biba pa decadanan den scuridad.
E ehecutivo di e compania di electricidad a splica cu pa e proyecto di ‘Luz den Bario’ e isla a keda reparti den 12 zona, di cual e promenan ta cay den e districto di Noord. Caminda cu a cambia di luz convencional pa LED ta mas dificil pa e ciudadano wak e apesar cu e diferencia den cobertura y claridad ta grandi. Den bario, e cambio ta mucho mas notabel cerca e ciudadanonan, segun Henriquez. “Ora cu ta pone luz pa prome biaha e ta trece hopi alegria den e bario. Trahadonan di Elmar tambe ta ripara esaki.”
Tanto Elmar N.V. como tambe Dienst Technische Inspectie y naturalmente Ministernan di Asuntonan General, Infrastructura y Energia cu ta motornan grandi tras di e proyecto ta hopi orguyoso di e resultadonan te aworaki y ta sigui avansa cu e trabounan. Henriquez a indica cu un bes cu keda cla cu Noord ta sigui na San Nicolas y despues ta sigui cu e area central di nos pais.