Director di DOW sr. Marlon Croes: Pa mas di 10 aña dow ta sostene turtugaruba cu baricada pa proteha neishi di turtuga

Stichting TurtugAruba tin hopi aña ta monitorea e beachnan na Aruba for di Arashi bay te cu Bushiri y otronan na San Nicolas tambe manera na Rodgers Beach y Baby Beach, pa wak si tin turtuga cu ta subi tera pa pone webo. Na momento cu un neishi wordo identifica, TurtugAruba ta informa DOW y pidi pa baricada y stand pa demarca y proteha e area.

Director di DOW sr. Marlon Croes a splica cu esaki ta sosodiendo pa hopi aña caba cu DOW ta brinda e sosten na e fundacion. Di e forma aki ta contribui na bienestar di Aruba door di percura pa proteha Aruba su especienan cu ta protegi.

Segun sr. Croes ta splica cu banda di e partnership aki cu tin cu TurtugAruba ta bezig tambe “in house” buscando sosten cu Parke Nacional Aruba y Departamento di Naturalesa y Medio Ambiente pa instrui trahadonan con pa identifica nos naturalesa ora cu ta traha, pa por sigui proteha naturalesa di Aruba.

Pa resumi sr. Croes a bisa: ‘Ta buscando partnership cu hendenan/instancianan cu tin e conocemento pa train nos hendenan pa nos bira miho y pa por tin mas wowo riba pia di trabou pa evita cu ta causa daño na nos naturalesa’.

Comments

comments