Director di CEDE Aruba, Daniel Tecklenburg: Minister Paul Croes ta stimula pa crea e conexion entre fundacionnan, comercio y hubentud

?

Na final di e anochi di presentacion y premiacion di Feria Social 2.0, director di CEDE Aruba sr. Daniel Tecklenburg tabata un di e personanan di mas satisfecho mirando e resultado di e programa cu nan a ehecuta den coordinacion cu Ministerio di Asuntonan Social, Hubentud y Labor. “Mi ta contento cu un Fort Zoutman completamente yen, tremendo ambiente, mi ta wak bek riba 15 fundacion cu a dicidi di habri nan curason pa hobennan cu kier haci un diferencia.”
E director di CEDE Aruba a expresa cu, atrabes di Feria Social, e ta wak hobennan contento cu nan ta envolvi y ta scucha hobennan cu ta bisa ‘mi kier sigui’. Na su opinion, mescos cu na esun di Minister drs. Paul Croes, esaki ta hopi bon paso hopi biaha nos ta bisa cu hobennan no kier participa, pero a keda demostra cu nos tin e hobennan cu si kier yuda.
Tanto Ministerio di Asuntonan Social, Hubentud y Labor, como sigur CEDE Aruba ta cla pa cuminsa traha riba e di tres edicion di Feria Social na 2017. Cada aña ta delega mas y mas responsabilidad na e fundacion conscientemente pasobra ta haciendo un trabou excelente y pa garantisa cu e programa tin un continuacion.
“Minister ta duna un tremendo apoyo den acerca comercio. Minister no ta haci fundraising, pero como Minister di Hubentud bo kier motiva e comerciantenan pa contribui y crea e conexion entre fundacion, comercio y hubentud. Nos ta contento cu e apoyo di dje y nos ta kere cu e proyecto aki ta bay haya su propio bida y e tin su raisnan awor. Fundacionnan ta contento cune, patrocinadornan ta wak e producto y asina nos ta spera cu e proyecto ta bira algo completamente riba su mes, cu e por sigui biba,” asina sr. Tecklenburg a finalisa bisando.

Comments

comments