Despues cu a firma un protocol entre gerencia di Arubus y sindicato STA, esaki no a ser cumpli cu awor ta pone cu trahadonan no ta mucho contento. Sr. Diego de Cuba di STA ta splica.
Despues di e ultimo accion cu tabata tin, un protocol a wordo fima, conhuntamente cu medidador di gobierno. Pero lamentablemente, den e concepto di delegadonan, representantenan di Arubus, cu ta traha den Arubus, y e directiva di STA, e director di Arubus no a cumpli cu loke ta para den e protocol. E structura di salario tambe ta un punto cu ta pega. E trapinan di salario, cu eigenlijk mester a wordo drecha. Tin un problema den e salario, p.e. Un schaal 4 cu tin 10 trede, anto trede 4 cu 5 tin mesun suma poni. Anto trede 8 y 9 tambe tin mesun suma poni. Anto esey ta nifica cu si bo bay di trede 4 pa 5 bo a keda mesun caminda para. Anto sindicato a splica gerencia di Arubus cu esey no por. Con bo por subi di trede, y keda cu e mesun placa. Nan no por compronde con e sindicato anterior por a permiti esaki. Pero STA kier un cambio den esaki. Aparentemente, Deloitte & Touche a traha un rapport ariba esaki y esaki a sali na fabor di e trahado. Pero den bista di e gerencia di e compania, nan kiermen cu nan ta bay perde placa. Nan lo saca mas placa, pero e placa lo ta destina pa e propio empleadonan, y nan merece. Sindicato STA a bisa gerencia di Arubus, cu loke nan a bin cun’e dilanti, nan no por biba cun’e. Pero hecho ta keda, cu ta varios biaha STA a purba di reuni cu minister ariba e asunto aki. E minister a bisa cu lo mester atende cu e director di e compania, pero tin cosnan mas profundo, cu e sindicato y e delegadonan kier atende cun’e. A splica minister, cu segun e empleadonan, e problema di mas grandi ta e director, pa cual e minister a keda asombra.
Dialuna siman pasa, ora cu empleadonan di Serlimar a bay den accion hunto cu sindicato, Sr. Diego de Cuba a papia ultimo cu e minister. Despues di esey, e tabata tin contacto telefonico cu e minister, y e minister a logra pa e sindicato, hunto cu e delegadonan, bay sinta cu e directiva di Arubus y esey a sosode despues cu nan tabata tin un reunion sindical cu e shopstewardnan. E ora eynan, den oranan di atardi, sindicato STA a sinta hunto cu e directiva di Arubus, den Cocolishi. Nan a sinta hunto cu Sr. Le Grand, Sra. Thiel, Kenneth Phillips, como tambe un mucha muhe Hulandes, Sr. Mohammed tambe tabata t’ey, hunto cu e delegadonan. Locual cu a wordo treci dilanti door di e propio delegadonan cu ta trahadonan di Arubus, ta un preocupacion y locual cu nan ta trece dilanti eynan tin tur valides y nan a haci esaki cu tur nan derecho ya cu nan ta delegadonan di sindicato, den Arubus, segun Sr. Diego de Cuba, di sindicato STA.