Aruba a experencia diferente interupcion di coriente den e ultimo dianan. Ta p’e moibo aki mes NV Elmar tabatin un rueda di prensa, relaciona cu e incidentenan aki. E idea di e conferencia di prensa ta pa Anthony Irausquin, director di ELMAR repasa riba e topiconan aki, relaciona cu e storingnan, hopi biaha menciona den prensa.
Rachel Kraaivanger, kende ta manager customer service y Albertico Koolman, manager operations y responsabel pa full e parti tecnico tabatey presente durante e rueda di prensa aki.
Segun Irausquin tabata hopi cla pa e cuestion di interupcion di coriente. Esaki no ta standard di Elmar, el a indica. Esaki no ta aceptabel. Elmar su staff y cada un di e personal ta traha tur dia pa cumpli cu nan deber pa suministra coriente na un forma confiabel, stabiel y continuo pa comunidad.
Sinembargo e ultimo dianan, Elmar a confronta varios problema di coriente. Pa ta mas specifico, tin un total di 15 storing desde 26 di april, cu ta inclui naturalmente e storing cu a sosode den WEB tambe.
Esaki ta keda un situacion cu no ta aceptabel pa Elmar. Si categorisa e storingnan aki, tabatin dos caso cu a wordo causa pa fli, tres caso causa pa blaas di helium, dos caso unda cu a dal palo di luz y uno cu a kima. Tabatin dos caso di kabelstoring, cinco caso cu tin di haber cu ahusta loke ta mantencion y un caso di storing na WEB, manera ya menciona.
Situacion den Elmar
E situacion ta cu a bin haya na 2021 un retraso den e parti di e mantencion. Pero den pasado e maneho tabata diferente. Kico ta maneho e tempo ey? E maneho tabata pa enfoca mas riba e expansion di grid y pa traha hopi mas trafohuis. Esaki tin e consecuencia aworaki, door cu e maneho ey no tabata enfoca riba e mantencion deibdamente di e infrastructura.
Pues, si mira e crecemento acelera cu ta presenciando e momentonan aki, e demanda di energia, ta sumamente grandi y esaki no a wordo premira den pasado. P’e motibo aki tambe a bin cu un plan di mantencion. Despues cu Irausquin a wordo nombra como director na 2021, hunto cu Utilities, bao maneho di Richard Eman, hunto cu e team tecnico, a bin traha y bin cu un strategia nobo y pone mantencion di grid como prioridad. Na 2021 a introduci un plan di mantencion despues di basta aña, p’asina ehecuta esaki debidamente.
Tin di remarca cu ta un temporada hopi dificil. Tabata un temporada despues di e pandemia. A menciona esaki na varios ocasion, unda cu e supply chain tabata un problema hopi grandi pa Elmar, unda cu e materialnan tabata tarda masha hopi mes pa yega. Un di e ehempelnan di mas grandi ta e trafohuizen cu en realkidad ta tarda dos aña mas of menos pa por ricibi na Elmar.
Despues cu Anthony Royer a wordo nombra como director di Utilities na 2021, cu tur apoyo cu a ricibi for di Minister di Energia, Glenbert Croes, hunto cu e hunta di supervision, Elmar a sigui amplia nan plan di mantencion y ta den un poceso n’e momentonan aki pa un mantencion hopi grandi y acelera.
A corta esaki for di cinco aña y kier haci e mantencion den tres aña. Esaki ta trece hopi reto cu ne, ya cu material ta keda un reto pa nan ricibi esaki na tempo. Si mira e aña aki mes, ta bezig ta bay construi shete trafostation nobo. Nan ta diseño nobo cu lo keda cla prome cu fin di aña. Cu e diseñonan nobo aki por instala ekipo mas moderno cu mester resulta den un suministro di coriente hopi mas confiabel tambe.
E demanda a crece enorme, segun Irausquin. E cambionan ta grandi, e demanda di energia ta sumamente grandi n’e momentonan aki.
