Pa loke ta e tema di Baby Luna despues di tende e famia y politiconan comenta cu AZV a cera porta, a acerca director di AZV, Anko Ringeling pa haya sa kico ta pasando un bes mas cu e caso aki, cu awo tin un mal contento pa un operacion cu e mama y tata kier pa e baby haya, caminda cu e ta splica mas di parti di AZV.
E ta comenta cu nunca por cera un caso, semper y cuanto cu tin cierto desaroyonan cu mester dicidi cu lo por tin un trato pa cualkier caso. Si limita na e caso di Baby Luna, e ta asina cu tabata tin un peticion di e mayornan cu riba nan mes a bay Merca, na Utah y eynan nan a consulta dokter pa wak si Luna por wordo opera. A base di esey nan a haci un peticion na AZV pa wak si ta dispuesto pa cubri e gastonan pa operacion ey. Regularmente, manera cu tin custumber, si haya peticion asina, ta pidi conseho pa cuminsa di e dokternan specialista local. Den e caso aki pediatranan y como cu e ta un caso no comun y coriente, mirando e malesa cu Luna tin, a pidi conseho tambe na Hulanda di dokternan specialista y na Colombia. Tur e tres consehonan cu a menciona anteriormente di pediatranan local, di e specialistanan na Hulanda, caminda cu a consulta cu dos grupo di specialista, uno ta un Centrum Aangeboren Hartafwijking Amsterdam/Leiden, cual ta cooperacion di dos hospital academico di Amsterdam y di Leiden, AMC Vrije Universiteit y Leidse Universidad, ta trahando hunto y ta forma un team pa e deficiencia aki y ademas tambe a pidi un conseho na e Erasmus Medisch Centrum cu ta keda na Rotterdam.
Tur conseho cu AZV a pidi tanto na Aruba como den exterior a bin negativo pa AZV cubri e caso aki pasobra e baby ta core risico grandi si opere. Pa un baby manera Luna, mirando su malesa, nan ta desconseha pa haci e operacion ey, como cu e operacion pa un baby manera Luna no ta usual y tin mucho riesgo cun’e. Esaki ta segun e protocol, e guidelinenan, cu nan ta manteniendo pa muchanan manera Luna. Loke a haci tambe a tuma contacto cu e dokternan na Merca pa pidi nan un tiki mas informacion y e dokternan na Merca tambe a confirma cu na Merca mes e operacion cu nan kier a haci riba Luna, tampoco no ta usual. E ta asina cu a compronde cu e dokternan ey cu nan si lo kier a haci’e pero a confirma na AZV cu na Merca mes e ta algo experimental. Es decir cu e no ta comun y coriente na Merca tampoco. No ta tur dokter ta haci’e, cu cerca babynan manera cerca Luna, tipo di operacionnan asina ta carga hopi riesgo cune, mirando e complicacionnan cu muchanan tin manera Luna, cu operacionnan asina no ta usual. A base di tur e consehonan ey cu a wordo haya, mester a dicidi cu e operacion ey no por a wordo cubri door di AZV y esey ta pasobra e ley di AZV ta bisa cu e asegurado tin derecho riba cubrimento di gastonan pa tratamentonan cu ta usual y coriente den e area di profesion, den e caso aki di e specialismo cu tin di haber cu curason y cu muchanan manera Luna, segun Ringeling.