Directie Scheepvaart ta preparando pa e tormenta tropical Matthew, cu awor a bira un horcan categoria 1, cu ya a cuminsa sinti e efectonan. Ta sperando cu e lo ta segun meteo, 200 kilometer mas of menos di Aruba ora e pasa, segun Carlyle de Coteau, di Directie Scheepvaart. Kico ta sperando ta hopi awasero, strena y lamper y riba diabierna, biento lo bira y bay direccion noordwest y lo bay haya hopi ola banda west di Aruba, banda di e hotelnan.Tabata tin reunion cu APA, hunto cu kustwacht y Directie Scheepvaart y Maritiem Politie y Astec. A palabra y a dicidi hunto cu suspende operacionnan na e wafnan di tres puertonan. Tambe a papia cu e operadornan di Valero y nan tambe a bisa cu pa diahuebs merdia nan lo suspende operacion di nan wafnan. Havenmeester a saca un comunicado y a mande pa tur agente pa asina manda pa tur barco afo y operacion pa tur tres waf a cera pa diahuebs merdia.
No ta pasobra cu awasero ta stop e operacionnan, a dicidi pa cera e wafnan pasobra e olanan grandi cu lo bay cuminsa suta e costa di Aruba, manera cu Matthew ta pasando y ta biniendo parti zuid y tur waf ta parti zuid di Aruba. No ta olanan cu ta bin diep di lama y bin Aruba y ta trece hopi piedra, etc. Ora cu e olanan kibra riba e wafnan, si tin barco chikito, por kibra barco daña waf, pesey a dicidi pa suspende e operacionnan na waf. Waf mes por keda habri, pero e operacionnan ta wordo suspendi y havenmeester a duna opdracht pa tur barco cu no ta pertenece na Aruba y pa sali for di nos wafnan y bay nan puerto respectivo te dia cu habri waf bek.
Prome cu habri waf Directie Scheepvaart ta esun cu ta duna ok pa habri waf y si mustra cu ta clear, e ora ta habri waf. Polis maritimo a bisa cu nan por duik masha lihe mes. E awa no mester ta clear y nan por sigura si waf ta bon. Manera cu marieitm politie duik, y duna ok e ora director di dsa por permiti pa habri e wafnan bek.
Manera cu tin actividadnan cu ta sosode cu tin di haber cu weer, meteo ta esun cu ta duna e boletin ey. Meteo a duna aviso pa barconan chikito. Ta haci un aviso pa tur puerto tuma precaucion y saca boto of check e botonan, mara nan bon si no por saca for di awa y si por saca for di awa, sacanan for di awa. Esey ta inclui e marina di Renaissance tambe. Sigura e boto mas miho posibel. E olanan ta biniendo di zuid. Tin experiencia cu e olanan aki por kibra pier y boto.
Dia Mundial Maritimo
Ta un dia special pasobra ta dia mundial maritimo. Tur aña ta celebra esey y tur aña e ta bay un tiki scondi, mirando cu e ta cay riba e mesun dia of un dia despues di dia mundial di turismo. Ta duna danki na tur Agencia na Aruba, Astec, APA, Valero, tur e representantenan di container cu ta bin Aruba, ta duna nan danki pa nan servicio cu nan ta brinda, pasobra esaki ta e dia Mundial Maritimo. E tema pa e aña aki ta “Sector maritimo ta esencial pa mundo.”