Directie Scheepvaart ta cuminsa bek cu inspeccion di botonan di pesca

Riba indicacion di Gobierno di Aruba y aplicando tur medida reglamentario, Directie Scheepvaart ta notifica e maneho temporal pa duna servicionan esencial. Como prome medida lo cuminsa exclusivamente cu inspeccion di boto pa pesca. Pa loke ta inspeccion di otro tipo di boto (cu no ta di pesca), e proceso aki ta suspendi na e momentonan aki y te cu proximo aviso.

Registracion di boto tampoco no ta posibel na e momentonan aki y lo avisa publicamente ora cu e posibilidad aki ta disponibel atrobe.

Rekisitonan pa inspeccion di boto di pesca
Ta necesario pa haci un cita pa inspeccion di boto cu Directie Scheepvaart. Pa cu esaki mester tuma contacto cu e departamento ariba diamars y diahuebs, entre 8’or y 11’or di mainta pa haya un cita. No ta permiti mas cu 1 persona na balie di Directie Scheepvaart, esaki pa sigura distanciamento social y medidanan di prevencion stipula pa Gobierno.

Inspeccion di boto pa pesca
Dia di e inspeccion di e boto di pesca, solamente ta permiti presencia di e doño di e boto. Esaki ta un medida pa mantene reglanan di prevencion pa cu COVID-19.
E funcionario encarga cu e inspeccion di e boto en cuestion tin e autoridad di cancela inmediatamente dicho procedura si no cumpli cu e reglanan stipula anteriormente pa cu esaki.

Directie Scheepvaart ta haci un apelacion na tur cliente cu ta rekeri di nos servicio, pa por fabor mantene tur medida indica caba pa prevencion di contagio cu COVID-19. Mantene tur medida di distanciamento social y higiena, ta esencial pa asina nos sigui contene y yega na elimina completamente e transmision di e virus COVID-19.

Masha danki di antemano pa e comprension y colaboracion.

Comments

comments