Manera conoci, actualmente tin varios discusion rond di e Waf chikito na Oranjestad. E waf aki ta parti den tres pida; uno ta di DOW, otro di APA y otro ta di Land Aruba. Aworaki tin un discusion andando unda tin un construccion na pida beach andando cual ta stroba piscadonan.
DIP ta na altura di e caso aki pero segun director Haime Croes, te ainda pa loke ta trata DIP, su trabao ta cla y aworaki loke ta bezig cune ta APA y DOW. “Te na unda cu ami sa, loke ta trata e parti pariba di e luga ta di APA, kiermen mi ta kere e discusion ey ta algo tog pa puntra DOW pa claridad riba kico ta e problema of aunke mi no ta kere no lo tin un problema, pero kisas tin un asunto di comunicacion”, segun sr. Croes. E parkeerplaats, e caminda y parti di beach tur ta cay bao di APA.
Loke ta importante pa DIP ta cu e lugar akinan tabata para pa aña sin haci nada cu ne anto e tabata bayendo atras, aworaki e ta bay bira algo bunita y tin hopi plan pa loke ta trata e area mes. “Y te na ultimo cu ma compronde, nan a pinta un splitsing, aworaki nan ta caba pa por cuminsa bende e condonan cu lo ta trata esey, y bezig pa yega na e parkeerplaats pa e por haya un bida atrobe”, segun sr. Croes.
Pa tur gobierno cu bay y bin, e prioridad ta e homber y muhe humilde, den e caso aki papiando di piscadonan. Si a caso mester yega asina leu, a puntra DIP si tin comunicacion cu e diseñadornan pa laga nan sa cu esakinan ta hendenan cu kisas por wordo perhudica. “E proyecto aki en principio ta hopi prome cu mi tempo, pero mi sa si di e desaroyonan cu vooral DOW a papia cu APA y diferente hende. Pasobra loke ta pesca ta cay bao di Santa Rosa, y te na unda cu mi sa a yega na cierto acuerdonan”, segun sr. Croes.