Entrante diahuebs siman pasa, DIP a haya un mandato unda minister president a pasa tareanan pa DIP unda cu normalmente minister encarga cu infrastructura tabata haci, pues e depolitisacion di otorgamento di tereno. Manera anuncia, tabata tin mas cu 500 acta di personanan cla pa construi cas of planta, pero esakinan no tabata wordo firma pa nan haya e tereno. Aworaki porfin e proceso aki ta bay wordo haci pa por pasa e actanan aki prome cu fin di aña.
A base di esey, DIP a traha un planning. Den e structura nobo aki, e director ta manda na un otro hende cu tambe mester wak y controla parew cu e director. For di siman pasa caba DIP a cuminsa y awe a yega na un total di 200 acta cu ta cla pa wordo otorga. A cuminsa caba cu tur esunnan cu tabata tin prioridad pa yega notario, nan a bay tambe. E 200 actanan aki ta encera diferente cos: mas o menos 80 hende cu tabata warda pa acta pa nan por yega notario, tambe proyectonan y huurgronden. E siguiente pa otro siman ta spera atrobe di por yega na un otro 200 mas pa caba tur locual tabata pega na DIP.
“E base di full esaki ta nos economia, nos economia mester draai”, segun Haime Croes, director di DIP. E director a agrega cu ta importante pa menciona cu hopi hende cu tabata warda ya a bini di biaha despues di a wordo yama. Nan ta contento y aworaki e unico cos cu nan kier ta yega notario. Normalmente notario ta sera pa 15 di December dus nan tin un luna pa paga, y despues bay banco pa busca hipoteca y kisas prome cu e aña aki nan ta haya acto di notario pa por construi pa Januari 2021.
E actanan aki ta di hendenan cu ta cla caba pa construi, nan ta pas cu full e beleid y hopi di nan ta warda for di 2004, 2006 y 2009. “Nos sa cu December ta un luna cu tur hende ta bay cas, y nos sa cu mita Januari nan ta cuminsa bek, dus nan tin un luna di tempo akinan pa busca banco y notario. Importante si ta cu instancia manera FCCA ta contento pasobra hendenan por bin cerca nan, economia por cuminsa draai”, sr. Croes ta expresa.
DIP a yega aworaki cu procesonan di 2012, y nan kier yega te ainda prome cu aña caba pa 2019 a base di un beleid, imporante pa DIP ta cu e hendenan tin un declaracion di banco. Banconan ta determina kico ta bay pasa aworaki, y unabes bo haya esaki automaticamente bo ta zorg pa bo pida tereno. DIP ta sacando actualmente verkavelingsplan cu eigenlijk gobierno ta sacando, pero esakinan ta pa hoogbouw.
Aworakinan tin na Bushiri cu a caba di Sali recientemente, un proyecto di 200 pa 300 cas cu di e lista di spera por bay wak pa nan por bay haya nan cas. Asina tambe tin na San Nicolas y diferente mas.
“Nos no por haal henter e actherstand di 2019. Paisnan grandi mes tin cinco aña di espera, kiermen nos ta pensa si nos por yega 2019, bo ta keda cu un of dos aña di retraso, bo a logra bo meta pa loke ta trata loke gobierno kier logra”, segun sr. Croes.
ROPV
E director ta bisa cu un otro aspecto cu DIP ta concentra riba dje ta esun di ROPV, cu ta e base pa desaaroyo. “Nos ta pone enfasis hopi cla, cu aworakinan si nos kier drecha y tin un Aruba ordena, structura, e ROPV ta sumamente importante pa nos tin e”, sr. Croes ta splica. Esaki ta pasobra DIP ta haya hopi critica cu barionan ta traha restaurantnan ban di cas, nan ta para dilanti cas di hende, y tur esaki ta aspectonan cu ROPV lo yuda cubri. Tin yen cosnan cu ta pasando na unda cu e ley tin cu bin pa por structura e aspecto ROPV.