Gianni’s Group den colaboracion cu FAVI ta organisando un evento culinario unico como fundraising pa e organisacion, cu e meta principal pa recauda fondo pa cu e servicio na personanan cu tin limitacion di bista. E evento a haya e nomber:
“DINNER IN THE DARK GIANNI’S GROUP EDITION”
Rond mundo e concepto di “Dinner in the Dark” no ta desconoci. Na Aruba ainda e concepto di “Dinner in the Dark” ta un concepto nobo. Manera hopi por corda, na luna di Augustus ultimo FAVI a tene su concepto di “Dare the Darkness” cual tabata sumamente exitoso. Gianni’s Group a sinta cu FAVI na mesa y a sinti su mes yama pa introduci e siguiente version den nan restaurant renombra Azia Restaurant & Lounge.
Den nos bida diario nos ta usa nos bista pa tur cos. For di momento cu nos lanta for di cama, nos ta mobilisando nos mes, pa prepara pa trabao, pa traha, pa core auto y naturalmente pa come. Bo ta mira e cuminda y e ta dunabo smak di come, pasobra e ta mustra bon. Ba jega di tende di e exprecion “nos ta come cu nos wowo”. Wel, durante di nos evento nos lo bay tapa bo bista pa algun ora. Ora bo bista ta tapa, bo otro sentidonan lo bai funciona mas optimal.
Como invitado bo lo bai experiencia un cena esquisito sin duda. Un cena specialmente prepara pa e anochi aki, door di e chefnan experiencia di Azia Restaurant & Lounge. Bo lo bai haci uso di tur bo otro sentidonan manera bo oido, bo olfato y mas cu tur bo smak, cu ta bai yudabo purba y descrubi tur e texturanan diferente durante di e cena.
E anochi lo ta un combinacion di cuminda exquisito, biña na gusto, musica den background den cual lo bira un experiencia inolvidabel.
Bo lo gosa, bo lo hari, bo lo no sa kiko bo ta comiendo, bo lo focus ariba locual cu ta pasando rond di bo, bo lo sucha cu mas atencion y bo lo purba tur detaye di bo cuminda.
Gianni’s Group y FAVI ta invita comunidad di Aruba pa asisti na e evento culinario unico aki. Bin disfruta di un cena realmente divino, bira conciente kico realmente e ta ensera pa tin un limitacion di bista. Contribui na un instancia cu ta dedica su mes specificamente na e personanan cu tin tiki bista of cu no tin bista.
E evento lo tuma lugar diasabra dia 5 di November cuminsando pa 7or y mey di anochi na Azia Restaurant & Lounge. Tickets ta na benta caba y nan ta limita. Tickets ta obtenibel na Azia Restaurant & Lounge y FAVI na un balor di $100 pa persona. Prijs ta inclui un 3 course menu y unlimited wine. Tur fondo cu wordo recauda pa cu e evento aki lo bai 100% pa nos fundacion pa por sigui brinda e servicio na personanan cu tin limitacion di bista.
Pa mas informacion, tuma contacto cu nos na 582-5222 of 592-2525. Cumpra bo ticket na tempo pa bo no keda afor.