Diez persona ta muri den candela den centro di entrenamento di club di futbol Flamengo

RIO DE JANEIRO, Brazil- Al menos dies persona a muri y varios mas a resulta herida den un candela den centro di entrenamento di e club di futbol Flamengo, na Rio de Janiero.
Segun Cuerpo di Bombero, tin tres herido, di cual dos ta grave.
E suceso a tuma luga den oranan laat di marduga di diabierna den e instalacionnan di Ninho do Urubu, caminda cu e ekipo carioca ta train como tambe e categorianan abao.
E candela a destrui e cambernan unda cu e hungadonan di e club di menor di Flamengo ta drumi, segun e hefe di Bombero, Douglas Henaut.
Ekiponan di bombero cu ta na e sitio ya a logra controla e candela y ta trahando pa evita cu esaki lo por lanta bek. Causa di e candela no ta conoci.
Rio de Janeiro ainda ta recuperando di e mal tempo pisa cu bientonan fuerte cu a asota e capital Fluminense diaranson anochi, cu a laga seis morto. Inundacionnan den varios parti di e zona, caida di mas di 150 palo y cantidad di auto destrosa.
E zona west unda cu e centro di entrenamento di Flamengo ta situa, tabata un di esunnan mas afecta pa e mal tempo.
Ninho do Urubu, considera como un di e centronan di entrenamento mas moderno di Latinoamerica, ta conta cu’n modulo pa e ekipo profesional di Flamengo y un espacio specifico pa e preparacion di keeper, ademas un zona di hospedahe.
Na 2018, Flamengo, cu ta e ekipo di futbol mas popular di Brazil, a inaugura un edificio nobo pa e hungadonan di prome division y a laga e edificio bieu pa hungadonan di e divisionnan mas abao di e club.

Comments

comments