Diesun nurse a logra finalisa nan specialisacion cu exito

Diabierna den un esfera sumamente alegre y yena di emocion Dr. Horacio E. Oduber Hospital a haci entrega di diploma na diesun nurse cu a logra specialisa. Di e diesun coleganan cu a gradua cuater nurse a specialisa den Cuido Intensivo, seis nurse di cual 2 ta di ImSan a specialisa den emergencia y 1 (un) nurse a specialisa den intervencion di cardiologia. E specialisacion aki a sosode den cooperacion cu Amstel Academie Amsterdam UMC.

Hospital ta pone hopi enfasis riba profesionalisa y specialisa pa asina eleva calidad di cuido y durante Covid-19 esaki tabata departamentonan cu sigur a forma un parti hopi importante den loke ta brinda cuido. E profesionalnan aki a mustra di ta comprometi cu hospital, comprometi cu comunidad, pero tambe tin perseverancia enorme pa logra nan meta.

Sr. Jacco Vroegop, director di hospital, a duna di conoce cu nan tabatin hopi reto durante nan specialisacion, pero na final tur a logra nan meta y ta algo sigur di aplaudi. Un meta cu Aruba sigur por ta orguyoso paso awo tin mas nurse specialisa pa brinda cuido riba departamento di ICU, departamento di Emergencia y tambe pa loke ta Intervencion di Cardiologia.

Vroegop a duna di conoce cu nan mester ta orguyoso di nan mes, pero tambe orguyoso di e team completo cu a traha incansablemente cu nan. HOH Academy cu a guia e proceso hunto cu un team cu a yuda p’e personanan aki por a crece den un carera nobo. P’e proximo añanan, hospital lo guia hende pa asina sigui profesionalisa y specialisa, esaki ta algo hopi necesario y ta spera cu esaki tambe ta mehora e calidad di cuido den hospital y pa comunidad di Aruba.

Hunta di Directiva y team di maneho ta orguyoso y ta manda palabra di pabien na e diesun graduadonan cu a demostra cu cuido y e pashent ta prioridad pa nan.

Comments

comments