Corte na Rotterdam a condena dos homber, Stevan F. (29) y Sedjean K. (29) na 18 aña di prizon cada un p’e asesinato di Stephano van Engel (31) den e districto Hillesluis di Rotterdam. Ta kere cu e asesinato a tuma luga bispo di aña nobo 2021, ta un acto di vengansa p’e asesinato anterior di Merwin “Junny” Frans, ruman di un di e acusadonan.
E caso aki a ricibi hopi atencion p’e forma brutal cu Van Engel a wordo asesina. N’e luga di e crimen a haya por lo menos trinta huls di bala Kalashnikov. “Ta un milager cu no tabatin otro victima,” a bisa den corte, referiendo n’e gran cantidad di hende cu tabata riba caya e anochi ey.
Segun corte, ta trata di un “asesinato brutal y cu sanger friu.” E acusadonan a cumpra un auto y telefon prepago specificamente p’e asesinato aki. E registronan telefonico a mustra cu e anochi en cuestion, nan a biaha di Dordrecht pa Rotterdam y tabata wardando riba Van Engel den Westerbeekstraat.
Den un principio, Ministerio Publico a pidi pena di prizon di 22 aña, ya cu a considera e asesinato como un represalia contra un famia rival. E asesinato di “Junny” Frans na mei 2020 den Bramentuin y despues e asesinato di su otro ruman, Shantienne Frans, na mei 2021, a contribui n’e hostilidadnan entre e famianan Curasoleño.
Defensa a pone na duda e credibilidad di un declaracion di e ruman muhe di Stevan F., supuestamente cu problema mental, y di un declaracion di un testigo anonimo riba e plannan di vengansa. Pero e obhecionnan aki a wordo rechasa pa corte.
E caso aki un biaha mas a enfoca e atencion riba e problemanan di disputa familiar di Corsou y e violencia di vengansa den e circuito criminal, cu ta resulta cada biaha mas den desenlace mortal riba caya.