No falta mucho pa fin di aña y tur cos ta kedando cla p’e siguiente Festival di Dande na Centro di Bario Brazil. Ya e tipiconan ta preparando nan repertorio pa trece un bunita show. Pero e biaha aki e lo tin un toke diferente. E biaha aki nan lo bay bek den antaño caminda cu hasta e trahenan ta ilustra e era eynan, sin lubida e platonan delicioso cu lo ta bendi riba e dia.
E festival aki lo tuma luga dia 27 di december y ya caba e expectativanan ta halto. E aña aki ta e di 53 aña cu e celebracion ta tumando luga den e bario di Brazill y entrada lo ta solamente pa 2 florin. Ta pa e motibo aki mes ta invita e bario di Brazil y pueblo di Aruba en general pa bin celebra cultura riba dia 27 di december.
Inky Richardson, presidente di Centro di Bario Brazil, a comenta cu hunto cu Fundacion Chico Harms, ta invita tur hende riba e fecha ya menciona pa ta n’e centro, pasobra e aña aki lo tin cos hopi special cu Fundacion Chico Harms a pone den otro pa ta un tiki diferente. Hunto cu esey, Centro di Bario Brazil lo bay reinaugura e baluartenan cu tabatin caba, cu ora tempo cu Chico Harms tabatey, a haci esey. Locual cu lo bay haci ta renoba esaki cu potret y pone nan bek na muraya. E anochi ey lo honra un of dos mas. Lo ta un homenahe chikito paden di e e centro y despues lo continua p’e festival di Dande.
Segun Richardson, ta kere pa duna honor na esunnan cu ta na bida, no ora cu nan bay. Aki a invita e famianan di e baluartenan honra p’asina pasa un rato alegre. E homenahe n’e baluartenan ta cuminsa pa 6:00 pm. Pa loke ta e festival mes, Tito Tromp di Comision Chico Harms, a splica e idea a bin padilanti pa bin cu un concepto nobo pa hinca den e Show di Dande cu lo bay tin.
E lo encera cu tin un total di 18 grupo. Despues di 9 grupo, lo bay tin un obra teatral unda cu ta bay presenta bibo con e dande di antes tabata wordo celebra na Aruba. Cu trahe di antes, full e escenario y e background lo ta di antaño. Tambe lo bay tin e dande manera cu tabata canta antes.
E setup tambe a pensa di cambi’e hacie algo mas familiar. E no lo ta estilo di teatro mas cu stoel banda di otro, sino lo pone mesa caminda cu e hendenan ta sinta caminda cu ken cu ta por sinta banda di otro mientras cu ta sinta wak e show. E entrada lo ta un sorpresa pa ora e publico yega lo ta algo diferente compara cu e otro luganan cu ta bishita. Segun Tromp esaki lo keda un sorpresa pa ora e hendenan yega anochi, con ta ricibi nan na entrada.
Tambe e cushina lo bay ta diferente. Aki lo bay tin cuminda di antes. Lo bay tin cabrito stoba, pisca tempera, suls. Kier purba di imita e dande di antes y tambe a cushina di antes. Lo bay tin varios stand cu diferente cos pa purba di antes. Tambe lo bay tin cos dushi cu hopi no ta custuma cu ne. E boyo di maishi rabo, lo tin coecoei cu e publico por purba. Tromp a relata cu lo transforma e luga den un luga di antaño. Di ora cu drenta via e porta te ora cu bay sinta, lo ilustra un museo cu articulo di antaño.
Asina ta pueblo di Aruba ta mas cu bonbini pa bin presencia un estilo unico di celebra e dia, drentando den un capsula di antaño scuchando e dande di antes.
