SAO PAOLO, Brazil- Al menos diez persona a muri durante un tiroteo entre polis y ladron despues di cu e ultimonan aki a purba horta den dos sucursal bancario di e ciudad Brazilero di Guararema, den e region metropolitano di Sao Paulo, según fuentenan policial a informa.
E dies victimana tabata sospechosonan den e robo y a fayece durante un intercambio di tiro cu e agentenan, cualnan no a resulta herida, según polis militar a confirma.
Un total di 30 ladron fuertemente arma cu fusilnan y pistool a purba atraca un di e sucursalnan di Banco di Brazil y Santander Brasil, situa na poco meter leu for di otro den e mesun caya na Guararema, un localidad turistico cu mas o menos 30 mil habitante situa na 80 km di Sao Paulo.
E delincuentenan incluso a rementa e atm mashinnan di un di e agencianan, pero e yegada di polis a stroba e hortamento.
“Prome cos cu a tuma luga tabata e intercambio di tironan cu polis di e region, cu a pidi refuerso. La Rota (e batayon di operacionnan special di Polis Militar di Sao Paolo) a blokia e rutanan pa e delincuentenan no scapa”, e comandante di la Rota, Mario Alves da Silva, a bisa den declaracionnan na medionan di comunicación.
Hortamento di machinenan di ATM door di haci uzo di explosivonan ta algo comun na Brazil y ta wordo ehecuta door di gruponan organisa.