E rol di Dienst Volks Gezondheid ta uno masha grandi, cual ta di garantisa salud di e pueblo, segun Sr. Staring, director di DVG.
E rol tambe a crece durante ultimo añanan. Bo por wak p.e. International Health Regulations, cual tur pais mester tene su mes na dje. Aruba pa añanan largo ta trahando ariba dje. Rond mundo, cu tin di haber cu siguridad con pa combati cierto problemanan manera malesa contagioso. Pero si e organisacion ariba su mes, el tabata mas grandi, el a bira mas chikito.
El a crece bek, ya cu antes ImSan y ambulance y Landslaboratorium tabata cay bou di DVG, pero esakinan a bira un organisacion ariba nan mes bou capa di Hospital. Antes e dokternan di cas tambe tabata cay bou di DVG. Dus tin un variacion den esey. Aworaki tin un plan di formacion traha, unda ta papia di 170 hende dividi den 86 diferente funcion, den 13 diferente departamento cu ta cay bou capa di DVG.
Sr. Staring a splica cu e comunidad di Aruba tambe a crece y ta parce cu ta tur siman ta bin un malesa nobo den region. E menasanan ta crece pero si wak bon, ta papia di un sistema di prevencion protocolario y sistema di colaboracion. Aworaki DVG ta hopi bon prepara pa diferente malesanan contagioso, of otro menasanan. Pero e ta mas un cuestion di preparacion, pa tin tur protocol y tur e plannan cla pa actua, den caso di un menasa.
DVG no ta forma un organisacion ariba su mes, pero un global. Nan prome instancia cu DVG ta bati na porta ta Rijksinstituut voor Volksgezondheid en Milieu, tambe DVG tin lasonan hopi estrecho cu CARPHA (Caribbean Public Health Agency) na cual tambe nan por pidi apoyo anytime. Sr. Staring a sigui bisa cu tur siman nan ta intercambia datonan y nan ta duna forma di apoyo technico y practico.