Tin basta dolor di cabes na SVB cu e trahadonan tin door cu tin hopi ley di LMA cu no ta ser cumpli cun’e manera mester ta. Presidente di Sindicato STA, Diego de Cuba, a splica cu e trahadonan lo bay bira miembro di e sindicato mirando e disgusto cu tin.
Trahadonan a acerca sindicato STA y lo bay duna un charla, hunto cu abogado di e sindicato tocante e situacion laboral cu tin awor aki y e diferencianan cu tin entre e LMA cu cual e empleado publico ta resorta bao di dje y e diferencia entre un LMA y un contracto colectivo. Logicamente cu despues di e presentacion aki, e empleadonan aki lo bay solicita tambe pa un referendum, cual segun de Cuba, den e caso aki no ta bay tin mucho necesidad door cu SVB no ta un NV. E ta un identidad, un Stichting. STA lo por representa nan. E decision ta bay keda awo den man di e empleadonan di SVB cu lo bay afilia na sindicato STA pa bay representa nan tambe. Tin hopi trabao na caminda a base di CAO nan cu ta pendiente pa caba cu nan. Tin esun di La Cabana, Frasa Trading, y tambe Aruparking cu tin den touw. Tin situacion cu e trabao ta bay bira mas hopi. A gana tambe e referendum di ASAP, cu ta e compania cu ta handle aeropuerto. Trabao tin, segun Diego de Cuba di STA.