Directiva di STA conhuntamente cu su delegadonan a reuni cu minister Chris Romero y bureau di e minister en cuestion ariba e situacion di Arubus NV.
Meta di e reunion aki ta pa dialoga ariba e situacion reinante y a papia ariba e director nobo di e compania cu mester drenta den su funcion den e simannan binidero. Aparte cu tin un flota di 15 bus nobo na caminda pa Arubus, lo bay tin otro 15 mas den e di dos mitar di aña biniendo Aruba pa forma un flota total di 30 bus, cual ta necesario pa asina Arubus por brinda un servicio optimal na su clientela. Arubus NV su servicio ta pa henter e comunidad di Aruba y tambe bishitante cu ta bin nos pais.
Aparte cu Arubus ta transporta studiantenan y 60 plussers na un tarifa subsidia tambe nan ta transporta hendenan special. Locual ta di remarca si cu hopi di e 60 plussers nan cu den nan mayoria ta hendenan cu no ta local cu ta traha ta haci uzo di e servicionan di Arubus hayando 40 rit gratis y akinan sindicato STA ta kere cu e subsidio di parti di gobierno mester bay aumenta y tambe pa locual ta e transporte di studiantenan. E debe actual di Arubus ta considerabel, no obstante esey STA a presenta un proposicion na gerencia di Arubus NV, cu copia pa minister pa asina, Dios mediante, cuminsa negocia dia 14 di mei binidero.
Directiva di STA por bisa cu e reunion a bay den un bon ambiente y cu hopi positivismo y cu pronto lo mira cambio den gerencia di Arubus y tambe den e vision nobo di e compania cu, a pesar di ta un “NV” di gobierno, tambe lo mester bay competi cu tur e otronan pasobra su sobrevivencia lo depende grandemente di esey. E empleadonan a wordo poni na altura di e contenido di e concepto nobo pa cu e CAO nobo durante un reunion teni dialuna 6 di mei y tur a aproba e puntonan cu STA y su delegadonan a bin cun’e. No lo bay ta e negociacion mas facil pero si tin boluntad y perseverancia partidonan lo logra yega na un CAO nobo cu lo combini ambos partido.