E director di IASA, sr. Gerald Fingal a invita sindicato STA, hunto cu e grupo cu a drenta na 2005 pa papia riba un beoordeling systeem nobo, cu lo bay wordo introduci awor aki, segun Diego de Cuba di STA. Loke e LMA ta presidi, esnan cu ta hefe di departamento, por delinea un sistema di evaluacion, pa e departamento cu nan ta practicamente goberna. Esaki el a bin splica tambe na e empleadonan di IASA y tambe el a trece padilanti e problematica di ziektemelding cu tin, caminda cu e ta bisa cu esey por afecta e evaluacion, aunke e pida ey STA no ta mucho di acuerdo cun’e, pasobra enfermedad di un hende ta cos serio y no por bay implik’e den un evaluacion di trabao cu un trahado ta eherce y no pa malesa. Berdad si ta y e ta un hecho tambe, cu bo ta haya hende cu ta haci wega cu lamentablemente tin cu bisa tin ora cu tur ora cu nan cobra, nan tin un patronchi di ziektemelding of ora di un fiesta tambe tin hende cu ta meld ziek y e ta riparabel. STA kier pa gerencia of esnan cu ta maneha IASA gara e toronan of si tin baca tambe den dje, gara nan na nan cacho. No por ta asina cu husto tin cu bay paga pa pecador. E ora eynan ta haya cu ta perde e obhetividad pa locual cu ta un evaluacion di empleadonan, segun de Cuba.
Conforme locual cu e LMA ta prescribi, tin cu no ta di acuerdo cu e evaluacion cu ta haya. Por tin un obhecion pero mester tin motibonan mara na dje, caminda cu e ora sindicato lo yuda tambe den e pida eynan pa entrega e obhecionnan na su debido tempo.
E evaluacion aki ta importante pasobra esaki ta stipula si ta bay haya un bevordering si of no. Bo ta keda crece den bo salario, bo ta keda crece den e posicionnan cu tin eyden y e ta di suma importancia pa e empleadonan ta na altura kico e beoordelingsysteem ta come y bebe.
Segun de Cuba, e director a papia cla y raspa y ta un sesion hopi importante pasobra si mester haya cu un evaluacion cu di sorpresa cay riba bo y bo no ta prepara p’e, e ora ey palo por cay. Awor aki cu tur hende ta na altura di kico ta e contenido, nan tin cu bay atene nan mes na dje, segun de Cuba.
Tin varios punto cu a wordo toca dene reunion, cu tambe ta di suma importancia. Nos pais awor aki ta den problema bastante grandi cu ilegalidad, pero no por culpa ningun empleado di IASA pa e situacion aki. Akinan minister Dowers ta esun cu ta e prome yama, hunto cu minister Benny Sevinger pa atende cu e asunto aki, segun Diego de Cuba.