E evento protocolario a tuma luga recientemente caba, den presencia di ehecutivonan halto di Citgo di Houston y invitadonan di PDVSA di Venezuela, unda a hisa banderanan di e paisnan y e companianan hunto cu Conseho di Minister di Aruba y ehecutivonan di Refineria di Aruba (RDA). “Pero awor falta e celebracion cu pueblo, cu tur esunnan cu a carga pasenshi pa e ultimo 4 añanan”, asina Alvin Koolman, director di Refineria di Aruba a enfatisa.
E evento pa celebra reapertura di nos refineria ta tuma luga diasabra awor dia 22 di October den Carnival Village na San Nicolas. E evento lo cuminsa for di 4or di atardi y lo sigui te den oranan laat cu un lista largo di bandanan musical cu lo haci nan presentacion pa e publico presente. E agrupacionnan y DJnan ta varia for di DJ Mike Ross, OBS Brassband, presentacion di Popcorn Dancers, Vince Irie, Tsunami Aruba, Janiro Eisden, Le Groove, show di vuurwerk, OREO y pa cera e anochi cu presentacion di e reina di Soca, esta Destra!
Entre 4:00pm pa 7:00pm lo registra tur esunnan cu drenta na e evento gratis aki, pa asina nan participa den rifa di bon di gasolin. Despues di 7:00pm, durante cada ora lo regala bonnan di gasolin entre e participantenan, pues yega trempan y participa. Unico condicion ta cu mester ta presente den Carnival Village pa por reclama bo premio mesora.
Tin varios motibo pa celebra, separa di e reapertura di e refineria, pero tambe pa e hecho cu pa prome bez den historia di nos pais, cu e compania cu ta distribui combustibel; esta gasolin, diesel, kerosin y jetfuel pa avion; tambe ta pertenece na Gobierno awor via RDA, pa garantisa cupo di trabou, inversion y continuidad den ofrece un servicio excelente y confiabel. E compania nobo Fuels & Marketing Services Aruba lo resorta bou di Refineria di Aruba.
Specialmente e pueblo di San Nicolas pero henter Aruba en particular ta masha contento cu reapertura di e refineria, den cuadro di su inyeccion den nos economia, crea cupo di trabou, inversionnan, lanta e optimismo y crea mas oportunidad pa San Nicolas y vecindario. “Algo asina nos mester celebra, pasobra ta un logro grandi esaki ta, garantisando trabou y prosperidad pa e decadanan nos dilanti”, asina Alvin Koolman a bisa.