Despues di tres anochi di prefinal, e finalistanan pa Aruba Caiso & Soca Monarch ta conoci. Diasabra awor, 26 composicion den e categoria di Soca y 11 den categoria Caiso lo resona den Carnival Village. Portanan lo ta habri desde 7’or di anochi y tickets ta obtenibel ainda na Citgo Palm Beach, Essoville, Boulevard y Santa Cruz y tambe na entrada di Carnival Village.
Un total di 14 banda y 32 cantante a logra clasifica pa e anochi final. E secuencia di banda lo bira conoci pa 6:30 PM despues di e trekmento di lot na Carnival Village. Stichting Musica ta urgi band leaders pa ta presente desde 6 PM. Varios radio emisora lo transmiti en bibo y sigur lo informa tocante e volgorde di presentacion. Tambe por sigi e Facebook page di Stichting Musica pa haya e informacion aki.
Stichting Musica ta informa cu e banda OREO a oficialmente retira nan mes for di e festival. Shaun Philips, Mighty Talent Jr., lo no participa mas y esaki ta haci cu e siguiente cantante cu e mayoria puntonan, cual ta Esmond “Papi Jones” Jones a ricibi e oportunidad pa participa cu su Caiso.
E ambiente den Carnival Village tabata masha ameno riba tur tres anochi di prefinal y henter Aruba ta keda cordialmente invita pa experencia Aruba Caiso & Soca Monarch 2018. Lo tin diferente specials na bar y manera ta custumber Setar NV tambe lo t’ey pa parti nan famoso gadgets. E aña aki lo por gana un Samsung Galaxy durante di e anochi, pues banda di bon musica, e publico sigur lo diverti nan mes sin fin.
Stichting Musica ta gradici tur partners y colaborador cu ta aporta na nos musica y cultura y ta haci e festival posibel, incluyendo SETAR N.V., Aruba Tourism Authority, Ministerio di Cultura, Aruba Airport Authority, Aruba Bank, Nagico, Tropical Bottling Company, Elite Productions, ATCO, Albo Aruba, Ecotech, K&G Boutique, Telearuba, King Ocean, Arubus, Johnson’s Enterprises y Universal Technologies.