Sr. Jayson Kock ta splica con e lo duna les di salsa na Centro di Playa Pabao, den estilo Portoriqueño.
E lo ta algo hopi leuk, baile ta algo hopi bon pa bo mente. Vooral ora bo ta bailando despues di un dia largo di trabao, bo ta haci algo di un les di salsa, e ta relaha bo mente. Bo ta desconecta y ta yudabo en general pa bo sinti bo mes bon atrobe, despues di un dia estresante na trabao.
Sr. Kock mes a siña baila na Scol di Baile Pachanga, pero tambe na Inglatera unda el a haya experiencia di con pa duna les. Tur hende ta diferente y esey ta un di e cualidadnan pa por adapta na cada hende su estilo indiviudal.
Salsa ta un baile hopi complica, pasobra hopi hende sa e pasonan crioyo. Pero Sr. Jayson Kock sa di e forma mas facil pa splica y tambe con pa e bailado compronde kico bo ta haciendo durante di un draai. Dus esey ta parti di e idea pa bin y participa na un les, cu ta completamente gratis y asina tur hende ta haya un bon idea di con e ta funciona.