Pa evita confusion cu e Festival Nuevo Mundo di Miami, Florida, e aña aki Nuevo Mundo Foundation di Aruba lo presenta su festival bou di e nomber Aruba Symphony Festival & Academy, un nomber cu ta refleha e parti academico tambe di e festival.
E programa inaugural ta 21 di Juli na Cas di Cultura. E ta consisti di musica popular di Beethoven y interpreta pa un trio di musico afama di Venezuela cu ta bon conoci na Aruba: Edith Peña, piano; Jorge Montilla, clarinet y German Marcano, cello. Edith Peña ta e prome musico Latino Americano pa wordo nomina pa un Grammy den musica clasico. Montilla y Marcano a yega di toca na Aruba desde tempo cu Armand Simon tabata organisa e Aruba Piano Festival durante e añanan 2007 – 2010.
E siguiente dia e mes tres musiconan lo compaña Cuarteto La Catrina den un concierto di musica Latina riba e crucero Freewinds. Cuarteto La Catrina ta consisti di: Simon Gollo, (Suiso/Venezolano) y Daniel Vega-Albela, (Mexicano) violinista; Jorge Martinez Rios, (Mexicano) ta tocado di viola y Jorge Espinoza, cellista, ta Chileno. Aña pasa La Catrina a inaugura e Festival y a cosecha hopi aplauso.
Diadomingo 23 di Juli pa 11or di mainta lo tin e popular competencia di e studiantenan den e sala chikito di Cas di Cultura. Entre e musiconan cu ta compiti lo tey atrobe Claudia Roa, e hoben pianista di Chile cu aña pasa a gana e premio di popularidad y a haci furor den un concierto abordo di Freewinds.
Dialuna 24 anochi den sala chikito di Cas di Cultura lo tin presentacion di “Concerti Grossi” cu Aruba Symphony Festival Viola Choir y Aruba Symphony Festival String Ensemble. Jean-Christophe Dobrzelewski, Mark Clodfelter y Rebecca Palmer lo mustra nan maestria como solista riba nan trumpet. Carlos Botero di Colombia lo dirigi e musiconan.
E mes atardi cuminsando 6or e Filharmónica Juvenil de Cámara de Bogotá consistiendo di 21 musico hoben Colombiano lo presenta un programa di musica Ruso cu e afamado violinista Ruso Dmitry Berlinsky como soloista. Tambe lo toca atrobe e pianista Venezolano Edith Peña.
Randolph Kelly, e prome tocado di viola di e afamado Pittsburgh Symphony Orchesrta lo debuta cu Aruba Symphony Festival dia 26 di Juli abordo di e crucero Freewinds den e programa “Musique Francaise”. E otro musiconan e anochi aki lo ta Edith Peña, piano; Simon Gollo, e fundador y presidente di NuevoMundo Foundation, fio, y e gran maestro di Brazil, e popular Marcio Carneiro, cello.
E prome presentacion di Aruba Symphony Orchestra (2017) dirigi pa Carlos Botero lo tuma luga 27 di Juli na Cas di Cultura. E hoben Colombiano Juan Sebastian Cortes, tocador di clarinet y ganado di e competencia di studiantenan di 2016 lo ta soloista. Pa cuminsa e programna titula “Mozart on One Musical Island” e anochi ey, nos propio Armand Simon lo toca piano, Jorge Montilla lo toca clarinet y Melissa Melendez, viola.
E penultimo actividad di ASF 2017 lo strena Nuevo Mundo Chamber Orchestra cu Jan Wagner como Director y resaltando como soloista Netanel Draiblate, violin y Courtney Miller, oboe. E concierto aki lo tuma luga 28 di Juli na Cas di Cultura, cuminsando 8:00 pm.
Aruba Symhony Festival 2017 ta clausura 29 di Juli cu e presentacion di Aruba Symphony Orchestra cu Carlos Botero como Director. Mescos cu na 2015 y 2016, e presentacion di un orkesta completo di mas di 80 musico riba podium di e sala grandi di Cas di Cultura lo lanta hopi expectativa. Mescos cu e añanan anterior, e aña aki e publico lo no keda desapunta.
E grupo di chikitinnan violinista entre 7 y 13 aña cu a toca den e concierto estudiantil di Scol di Musica Rufo Wever lo toca un anochi, aunke e fecha no a wordo fiha ainda. Mescos, un hoben pianista di Aruba cu lo drenta e Conservatorium di Limburg e aña aki tambe lo habri e programa un anochi, pero e fecha pa esaki tampoco no a wordo fiha ainda.
E programanan detaya di cada funcion lo wordo anuncia despues. Keda pendiente .