Dialuna venidero, dia 28 di Augustus 2017, cuminsando pa 10or di mainta, lo tuma luga un reunion publico den Parlamento pa trata e proyecto di ley pa institucion di un fondo presupuestario temporal en conexion cu alocacion di e fondonan cu a resta di Fondo Desaroyo Aruba.
Griffie di Parlamento den nomber di Presidente di Parlamento, sra. Mervin Wyatt-Ras, kier a haci uzo di e oportunidad aki pa participa na pueblo di Aruba cu dicho reunion lo wordo transmiti atrabes di “Radio Parlamento Aruba” riba e frecuencia modular 105.9 FM. E transmision aki ta un primicia ya cu lo ta e prome biaha cu Parlamento di Aruba ta transmiti via su propio canal, no-comercial, di radio. Esaki ta otro paso historico den e cuadro di existencia di Parlamento di Aruba.
Por haya Radio Parlamento Aruba tambe riba e app TuneIn Radio riba bo aparato mobil of via Internet riba https://tunein.com
Na un y tur pues e invitacion pa sintonisa e transmision dialuna awor cuminsando for di 10or di mainta.