Skirbi pa Clyde Harms
Aruba Symphony Festival ta continua awe nochi 8or abordo di Freewinds cu un programa di puro musica Latino Americano. Lo toca composicionnan di Paquito de Rivera, Astor Piazzola, Miguel del Aguia, Ernesto Lecuona y varios mas. Orquesta de Camara Felix Morgan consistiendo di musiconan femenino di Cali lo debuta cu un programa varia di musica di Colombia y otro paisnan Latino Americano. Manera semper, e ambiente abordo di Freewinds ta bay ta great. Entrada ta gratis.
Concierto fantastico di Aruba Symphony Festival na Ritz-Carlton
E programa di diamars anochi tabata yama “Virtuosi of the Aruba Symphony Festival” y e musiconan cu a participa a demonstra cu nan ta berdadero virtuosi. Cada uno a haya chens pa mustra nan excelencia cu nan instrumento. Cu e piesa dificil Tango Etude #4 di Astor Piazzola, Nicole Esposito, profesora di flauta na Universidad di Iowa a fascina e publico. Benjamin Coelho, e tocado Brazileño di bassoon a mustra cu e ta un berdadero profesional tocando Waltzes for solo bassoon di Francisco Mignone. Pero tabata e clarinetista Venezolano, Jorge Montilla, bon conoci y popular na Aruba, cu a cosecha e aplauso mas fuerte cu su rendicion di Virtuoso Swing Solo di Armando Ghidoni. E tres musiconan aki a habri e programa cu e piesa Rubispheres for Flute, Clarinet and Bassoon di Valerie Coleman cu a cay masha di agrado cu e publico. Efinale di e anochi tabata na encargo di e quinteto internacional consistiendo di Netanel Draiblate, fio, di Israel; Federico Hoyos, fio, di Colombia; Randolph Kelly, viola, di Merca; Horacio Contreras, cello, Venezolano y e studiante Alejandro Acosta, cello, Colombiano, kende a sali number dos den e competencia di aña pasa. Den un forma magistral, e quinteto a toca e piesa largo Schubert String Quintet in C major (D.956, Op. posth. 163). E aplauso tremendo cu nan a ricibi na final tabata mereci. Ami a gusta masha con e studiante Acosta tabata “pluck” su cello pasionalmente durante un gran parti di e piesa y con Draiblate tabata contest’e cu un “pluck” riba su fio. Mi no por a kere ora cu mi a tende cu ta solamente 5 ora e quinteto a practica hunto. E concierto berdaderamente tabata di clase mundial, manera un amigo a remarca.
Daniela Perez ta ganado di e competencia di studiante
Daniela Perez violinista di San Cristobal, Tachira, Venezuela, di apenas 13 aña a wordo nombra pa e hurado como e ganador di e competencia di studiantenan cu a tuma lugar na Cas di Cultura diadomingo mainta. E premio ta e “Clyde Harms Scholarship” cu ta permiti’e bolbe otro aña sin paga un cen y e lo haya chens di toca solo acompaña pa e Aruba Symphony Festival Orchestra. Alabes e publico na e competencia tambe a eligi’e como nan candidato, asina cu Daniela tin e distincion di a gana tur dos premio. Pabien na Daniela. Mas di esaki den un otro articulo. [email protected]