Departamento di Cultura Aruba (DCA) hunto cu Paseo Herencia cu ta un Centro Comercial cu desde su inicio ta reconoce nos baluartenan riba diferente tereno. Na e ‘Amphitheater Edgar Connor’ tin e posibilidad caminda nos artistanan por expresa nan arte relaciona cu nos baluartenan. Den e caso aki Paseo Herencia a scoge un di nos baluartenan pa pone riba e podium, cu ta den e personahe conoci na Aruba, Antia e tempo ey y Hulanda, kende ta Sr. Rudolfo Valentino ‘Vale’ Croes, den feliz memoria.
Sr. Vale Croes d.f.m. tabata un personahe hopi reconoci y cu a destaca den e mundo cultural. T’asina cu tabata deseo propio di ‘Don Vale’ Croes pa un dia un potret di dje ser traha door di un artista Arubano. Aunke esaki no a logra prome cu Sr. Vale Croes a bay laga nos. Pero Gerencia di Paseo Herencia a haya cu ta hopi importante pa duna e reconocimento na nos baluarte aki. E proyecto a inicia un par di aña atras pa traha un relieve di Sr. Vale Croes y esaki lo ser inaugura na luna di november dilanti porta riba diadomingo 4 di november. Cual luna y riba dia 5 di november venidero ta e fecha natal di Sr. Vale Croes. El a bay laga nos riba dia 6 di april 2015. Pa nos recorda Sr. Vale, e luna di november di su fecha natal ta net un bon momento pa inaugura e relieve di Sr. Vale riba e podium na Paseo Herencia. Un localidad caminda tur dia ta ser bishita door di bishitantenan, tanto local y internacional, tambe semper tin bon ambiente cu ta refleha e personahe cu ta den persona di nos Vale Croes.
Reconocimento di nos baluartenan ta cay den nos (12) puntonan di prioridad di nos ‘Plan di Maneho Cultural’ y e Maneho Cultural di Ministerio di Cultura.
DCA tin e encargo pa duna atencion na personahe cu a destaca den e mundo cultural. Como meta principal pa informa y conscientisa comunidad y e turistanan e importancia di e personahenan cu a destaca den un of otro ramo cultural como e pilarnan di nos cultura. Tambe ta pa stimula nos artistanan riba tereno di creatividad y arte.
Sr. Vale Croes, d.f.m. tabatin mas di tres decada haciendo presentacionnan humoristico, conoci como ‘Show di Vale’ su ‘One Man Show’, stima como ‘E Arubiano Original’, e gran chaskero, e comico, actor, cantante y carpinte fini.
Na 2016 ‘Don Vale’ a ser honra tambe door di SMAC, como e Pancho hopi conoci y gusta durante e decadanan den Carnaval. A tene un exposicion di su trayectoria di su logronan en general den e sala di exposicion cu yama ‘Sala UNOCA’ na Cas di Cultura cu nos por bisa tabata cas di ‘Don Vale’ Croes.
Cultura ta nos pasado, presente y futuro. Pa e motibo aki nos ta dilanti porta di e desvelo di e relieve di Sr. Vale Croes pa di e forma aki keda existi pa hopi tempo y sigur pa nos futuro generacion por conoce y busca mas pa sa kende tabata Sr. Vale Croes, e gran chaskero, comico, actor, cantante, carpinte fini, un gran humoristico di Aruba, Antia y conoci na Hulanda tambe. E tabata conoci tambe como e ‘Arubiano Original’.
E proyecto di realisa e relieve di Sr. Vale Croes a keda den man di nos artista local Sra. Maritza Erasmus, escultor masha conoci riba nos pais. Pa e ceremonia di e desvelo nos lo bay haci un anochi cultural riba diadomingo 4 di november 2018 cu ta bispo di su fecha natal. E evento lo ta for di 06:30 pm pa 08:30 pm na e ‘Amphitheater Edgar Connor’ aki den Paseo Herencia pa nos publico en general.
Nos di DCA ta gradici Gerencia di Paseo Herencia, Ministerio di Cultura y Minister Sra. mr Xiomara Ruiz Maduro, nos director, nos artista local Sra. Martiza Erasmus, y e famia di ‘Don Vale’ Croes cu a permiti nos haci e proyecto aki. Tambe un gradicimento ta bay pa mi coleganan di DCA cu a trek e proyecto pa realisacion di e desvelo. Y nos ta invita henter pueblo di Aruba pa bin presencia e anochi cultural aki den Paseo Herencia… Entrada ta gratis.