Dialuna a habri inscripcion pa e expedicion arqueologico 2016 y di biaha interesadonan a cuminsa yama Museo Arqueologico pa inscribi pa e recorido riba bus of pa haya mas informacion con pa bishita e sitionan arqueologico cu nan propio transporte riba diadomingo dia 18 di September entre 10’or di mainta pa 1’or di merdia. E expedicion arqueologico ta ser ofreci gratis na participantenan y ta den cuadro di luna di Monumento.
E area di San Nicolas tin un historia valioso, tanto di e periodo Amerindio como di e periodo historico di Aruba. Pa e expedicion di e aña aki lo bishita e sitionan arqueologico di Manzanilla, Banki Jerome y na Colony/ Rodgers Beach. Durante e recorido lo tin expertonan sea di Monumentonan di Aruba, e historia di Industria di Aruba, Cultura y mas riba cada bus. E aña aki lo colabora un biaha mas cu Stichting Monumentenfonds, pero tambe cu Fundacion Museo Arubano cu dialuna anochi a habri e Museo di Industria na e Watertoren di San Nicolas y e Museo di Comunidad na San Nicolas Store, cual ambos lo forma parti di e recorido den pasado na San Nicolas.
Alabes Museo Arqueologico a haya colaboracion di Stichting Rancho pa cual Museo tambe ta hopi agradici. Participantenan di e proyecto existoso “Tempo pa Click” lo documenta e expedicion arqueologico 2016. E proyecto Tempo pa Click tin como meta pa duna residentenan di Rancho e oportunidad pa expresa y refleha riba nan experiencia bibando den Rancho y e asuntonan social presente den e bario dor di uzo di fotografia. Stichting Rancho a organisa e proyecto na 2015 y 2016 pa potret y film. Documentando e expedicion arqueologico ta duna e participanten e oportunidad pa keda desaroya y promove nan mes den fotografia. Pa mas informacion trocante e proyecto exitoso aki por subi https://www.facebook.com/tempopaclick/
Pa participa na e Expedicion Arqueologico mester registra pa reserva cupo riba e bus. Pa haci esaki por yama Museo Arqueologico na 582-8979 y puntra pa Cristy Werleman. Tambe ta posibel pa haci un dushi recorido cu propio transporte cu famia y amigonan. Yama Museo pa mas informacion di e ubicacion di e sitionan unda e arqueologo y asistente di arqueologo lo ta presente diadomingo dia 18 di September entre 10 am pa 1 pm pa duna tur bishitante e dia aki informacion di e lugarnan aki cu ta asina valioso pa nos herencia cultural.