Dia 10 september 2018, Stichting Arubaanse Muziekschool/Scol di Musica Rufo Wever a cumpli 65 aña. Diadomingo awor 9 December 2018 pa 4’or di atardi den Cas di Cultura, alumnonan di Scol di Musica Rufo Wever, bou di guia di e docentenan, lo conmemora y celebra e ocasion special aki cu un concierto completamente gratis pa publico. Alumnonan a prepara un programa varia pa e temporada di fin di aña. Nan lo comparti nan talento y loke nan a siña na Scol di Musica Rufo Wever den cancionnan crioyo, regional y tambe internacional. Nan lo mustra nan abilidad riba diferente instrumento y lo presenta den gruponan chikito, grandi y tambe como solista. Cu hopi entusiasmo y dedicacion nan ta preparando pa e dia aki, pa asina regala e comunidad di Aruba un magnifico concierto. Amantenan di bon musica no por perde e oportunidad aki di scucha y mira nos futuro musiconan. Aruba henter ta keda cordialmente invita na e concierto ‘65’ di AMS/SMRW. Esnan cu ta desea di presencia e concierto aki por pasa busca carchi cerca administracion di Scol di Musica Rufo Wever na Cas di Cultura piso ariba of na porta dia di e concierto.
Na nomber di Stichting Arubaanse Muziekschool/Scol di Musica Rufo Wever