Na tur esnan cu tabata warda anciosamente riba e afamado Mercado di Santa Rosa, esaki lo ta diadomingo awo, dia 2 di April. Esaki ta e prome mercado pa e aña aki 2017.
Hopi ta esnan cu tabata tuma contacto cu e Departamento di Agricultura, Cria y Pesca Santa Rosa pa puntra cua lo ta e fecha di e prome Mercado Santa Rosa. Manera tin e dicho cu bisa“Penado no ta Pena pa Largo”. Y nos ta den porta di e prome mercado.
Manera semper e mercado cu ta asina bon bishita cu for di tur skina nos bishitantenan ta yega pa sina pasa un rato agradabel disfrutando di e mercado y tur locual tin pa ofrece. Cuminsando cu productonan local fresco produci manera entre otro Remedinan di Tera, Productonan pa Cabey y Cutis di nos propio Aloe asina nos por sigui menciona. Otro productonan fresco tambe ta manera diferente tipo di pica traha netamente pa nos hendenan local.
Nos artesanonan cu semper ta contribui grandemente cu nos mercado cu nan piesanan bunita traha ta cu tokenan di antaño y semper bunita acaba.
E cuminda dushi crioyo no por falta den nos mercado di cual hopi ta esnan cu ta bin hasi nos un bishita pa por disfruta di un bon plato prepara. Hopi ta esnan cu kisas tin hopi tempo sin come entre otro un Comcomber Stoba, of un Cabrito Stoba, Papaya Stoba cu ta den nos mercado so bo ta haya tipo di platonan asina. E sopi cu no por falta sigur riba un bon diadomingo kisas ta drecha e dia.
Matanan ornamental cu sigur tur nos bishitantenan ta tuma e oportunidad aki pa asina haci nan hogar mas bunita ainda. Ta diferente tipo di mata y grandura y sin papia mes di e variedad cu nan ta scoge. Matanan di fruta cu sigur tur hende lo kier tin un na cas.
Nos no por lubida riba nos muchanan cu tambe ta bin di bishita hunto cu e mayornan nos tin nos “Cunucu di Chabelito” cu e muchanan por pasa un rato agradabel admirando nos bestianan cu nos tin mientras e mayornan por difruta di nos mercado. Tambe lo tin un “Dino Jump” pa e muchanan.
Pasabocanan dushi cu no por falta den nos mercado manera diferente tipo di Bolo y Cukinan sabroso.
Pa nos pone mas ambiente ainda na tur locual lo bay wordo encontra den nos mercado lo tin un ambiente musical sigur formidabel di Tipoco Alegre Kadushi largo.
Awo bo ta bon informa tan a unda e ambient eta e diadomingo aki, dia 2 di April cuminsando for di 9’or di mainta te cu 2‘or di atardi cu nos Mercado Santa Rosa anto na Santa Rosa mes.
Bo ta keda cordialmente invita pa pasa un rato ameno y den famia hunto cu nos e Prome Mercado Santa Rosa.