Diabierna anochi den un Joe Laveist Ballpark yen di fanatico di baseball a duna inicio na e temporada di baseball cu e campeonato di Aruba Little League 2017. E deporte di baseball na Aruba e ultimo añanan a crece grandimente danki na e popularidad di Xander Bogaerts cu e ekipo Boston Red Sox. Un total di mas di 1200 mucha di e liganan di North, Center y South a uni pa asina tur e ekipo di Aruba participa na e desfile inaugural. E damanan di softball Little League a habri e desfile diabierna anochi, sigui pa esnan di mas chikito di edad di 5-6 aña te na esnan mas grandi di 17-18 aña cu a desfila pa e publico grandi na Joe Laveist Ballpark. .
Aruba Little League ta un organisacion cu ta depende ariba voluntarionan cu ta duna di nan tempo pa por dedica na sinja e muchanan e deporte di baseball. Y commercio engrande ta apoya e programa di Little League door di sponser varios ekipo di Little League pero un sponser grandi e aña aki ta Subway Aruba. Nan a haci desvelo di e logo cu ta hiba e nomber di Little League Aruba Subway Series unda cu Subway a sponser mas di 200 caha di bala pa asina por organisa e campeonato di Little League y e cuerpo di umpire tambe lo ricibi nan uniform nobo for di Subway.
Aruba South Little League a organisa e anochi ameno di apertura y asina e president di liga Sr. Serio Romney a bay over na entrega un plakaat di reconocimento na umpire Sr. Esmond Jones pa su añanan di dedicacion na South League. Despues Sr. Donny Kelly a sorprende Sr. Serio Romney cu un grato sorpresa y annuncia cu e campeonato 2017 di South Little League lo ser dedica na Sr. Serio Romney.
Despues Sr. Serio Romney a duna danki na un sponser di mas di 30 aña pa Aruba South Little League di Kiwanis Aruba. Representante Sra. Aurora Dijkhoff a hiba palabra na nomber di Kiwanis unda nan a presenta un check como donacion na e liga.
Finalmente District Administrator di Aruba Little League Sr. Rhudy Donata a presenta e sponser official di Aruba Little League cu e aña aki lo carga e campeonato Little League Subway Series Aruba. Representante di Subway Aruba Sr. Tai-Foo Lee a haci entrega simbolico di un caha di baseball na DA Sr. Donata demonstrando asina nan compromiso grandi cu nan tin cu e deporte di Little League como main sponser.
Na ultimo a hiba palabra Sr. Ebby Schwengle cu a representa Minister di Deporte unda e la duna palabra di elogio na tur e e voluntarionan y mayornan cu ta haci e esfuerso pa educa nan yiunan den e deporte di baseball.
E hoben Jayden Jansen di e organisacion di Hurricanes a lesa e credo di Little League, mientras cu Jeanine Roga a lesa e credo di mayornan y e crew di umpire a lesa e credo di umpire pa recorda cada un e importancia di e programa di Little League. Sr. Ebby Schwengle tawatin e honor di tira e “first pitch” mientras cu Sra. Aurora Dijkhoff a fungi como e bateador y asina a duna inicio official na e campeonato di Aruba Little League 2017.