Diabierna awor, 6 September 2024, Corte di Husticia lo trata e caso penal cu Ministerio Publico a cuminsa contra e dama Gonzalez y e homber Jimenez. Nan ta e 2 sospechoso di e asesinato cruel di e miembro di CEA, Sergio Maduro.
MAS NOTICIA por a compronde cu Corte di Husticia a reserva henter e dia pa tratamento di e caso.
ASESINATO CRUEL
Na Mei 2024, e dos sospechosonan a presenta dilanti Hues pa un caso pro forma.
E acusacion contra Gonzalez y Jimenez ta cu riba bispo di Pasco, 24 December 2023, a choca Maduro cu forza y despues draai su nek varios biaha di robez pa drechi. Tambe nan a cera Maduro su garganta cu forza y despues push’e bent’e for di e auto.
Despues nan a pasa auto riba Maduro diferente biaha.
Ta sospecha cu Gonzalez cu tabata e pareha di Maduro, a pidi Jimenez pa mata Maduro door di priminti’e pago y a paga un adelanto tambe.
ABOGADO KIER PA INVESTIGA TUR DOS SOSPECHOSO
Abogado mr. D.Croes a bisa Hues cu e dama Gonzalez, ta un persona special y abogado kier pa laga haci investigacion si Gonzalez por a planea e asesinato. E abogado tambe a pidi pa psychiater evalua Jimenez pasobra Jimenez a bisa e abogado cu hopi biaha e ta scucha stem(nan) ta papia cun’e.
Fiscal a reacciona mustrando cu tin psycologo ta evalua Gonzalez y esey lo por duna splicacion.
Tambe Fiscal a bisa cu psychiater a evalua Jimenez y tin un raport cla.
Diabierna awor lo informa con tratamento di e caso a bay y ki castigo Fiscal a exigi.
