E exitoso torneo di basketball di club Aruba Juniors na ocasion di su 85 aña di existencia ta clausura Diabierna awor cu e partido final entre Celtics y Warriors, pero prome cu e partido ey lo tin e final di e contest di 3 point shooting. Tur esaki lo cuminsa pa 7’or di anochi cu acompañamento di musica y un anunciador pa anima e contest y e wega.
Pa loke ta e partido final di e open-league tin e team di Celtics cu a lidera e torneo riba papel, pero den realidad nan a termina cu e mesun record di 4-2 cu Warriors. Bisando esaki por conclui cu no tur ora e competencia tabata facil pa nan. Hopi biaha nan mester a hinca extra esfuerso y dedicacion pa e score final por a sali na nan fabor. E base di e team, forma pa Arron Stamper, cu ta e chispa di e team, Starling Arrismendi y Eloy Ruiz a sa di uza nan experiencia na e momento crucial pa e exito di nan team.
Di e otro banda tin Warriors, cu ta un team mas hoben y ora cu nan uza nan talento bon, nan por causa hopi daño na e team contrario. Jovanho Maduro, Elijah Whitfield y Michael Charles ta combina haltura y efectividad y si nan trankilisa nan wega, buscando e hungado habri nan por ta un “tough cookie” pa gana. Tampoco nan no mag perde nan focus door di laga e contrario afecta nan temperamento y pone nan perde nan cabes. Pues e lo ta un partido cu hopi den wega, caminda e betnan ta riba Celtics, pero no pa un margen abrumador. Den e cayente di e anochi hopi cos por pasa.
E exito di e torneo tabata grandi y tur cos ta mustra cu pa e proximo torneo lo introduci e fenomeno di “trading” entre e ekiponan. O sea cu e teamnan lo por negocia cu un otro team pa haya un hungado particular a cambio di un otro cu mas lo surti e manpower cu nan mester. Claro cu esaki lo funciona bao di un reglamento pa e no bira un free-for-all.
E highlight di e anochi di diabierna awor, ta e ceremonia di premiacion. Aki lo premia e hungadonan di e team campeon, pero tambe e hungadonan cu individualmente a destaca mas. Ta un tradicion na Aruba cu unicamente esun cu a anota mas punto ta haya tur e atencion, siendo cu sin e ayudo di otronan, posiblemente e team lo no a cosecha e mesun exito. Pesey lo saca e hungadonan cu mas a destaca den un disciplina particular. Asina por menciona cu lo tin premio pa e MVP di e torneo, pero tambe premio pa e top-rebounder, top-assist y top-scorer.
Despues cu tur e actonan oficial y ceremonial ta tras di lomba, lo invita e hungadonan pa e parti social cu lo inclui entre otro un barbecue.