Diabierna 9 di Februari MEP ta celebra su 47 aña di existencia

0
RBC Juli 2018
Funmiles-2018

Diabierna 9 di februari MEP ta celebra su 47 aña di existencia. 47 aña di lucha y sacrificio, 47 aña na defensa di e pueblo Arubano, pero tambe 47 aña di logronan historico pa pais Aruba. Tabata riba 9 di februari 1971 cu nos lider inmortal Betico Croes a funda e partido Movimiento Electoral di Pueblo (MEP). Desde principio caba partido MEP a pone su dilanti e ideologia social-democrata, nos structura estatal y union di henter e pueblo Arubano, sin distincion di rasa, color, religion, status social etc.

Un nucleo solido
E decisionnan tuma riba dia 9 di februari 1971 a ser ratifica durante e promer Congreso di MEP cu a tuma lugar dia 14 di februari 1971 den teatro Rialto na Playa. Durante e congreso aki, dirigentenan di e partido U.N.A. (Union Nacional Arubano) tambe tabata presente y nan a dicidi di uni nan mes na e partido recien funda MEP. MEP ta wordo considera como un partido prestigioso. Un partido cu desde su fundacion a keda un partido grandi cu un nucleo solido y esaki durante 47 aña largo, ya cu MEP despues di su promer salida cu 7 asiento nunca den e eleccionnan siguiente a yega di baha bao di 7 asiento. Den henter Reino Hulandes no tin un partido politico cu un trayectorio asina impresionante!

Tres lider exitoso
MEP ta un partido cu desde su fundacion te cu awor apenas a conoce tres lider, esta Betico Croes, Nelson Oduber y Evelyn Wever-Croes. Pa yega na un trayectorio impresionante asina ta evidente cu e partido mester a haci hopi cos grandi pa e comunidad aki. Y esey MEP a haci den un forma cu no ta laga duda atras. Durante e ultimo 47 añanan MEP a traha incansablemente pa e desaroyo di Aruba, tanto riba tereno estatal, economico, social, cultural, deportivo etc. MEP como un partido cu ideologia social democrata semper a tene na bista cu e ser humano y specialmente esnan di menos recurso mester ta central den e desaroyo aki.

Curashi y determinacion
Despues di e promer salida exitoso na 1971, un lucha tenaz a ser hiba door di MEP pa logra e ideal cu ta biba den curason di cada Arubiano, esta nos libertad, nos Status Aparte. Danki na e curashi, perseverancia y determinacion di Betico Croes hunto cu su partido MEP cu a logra pone e politiconan Antiyano y Hulandes y hasta su opositornan respeta deseo di pueblo. Pa por a yega asina leu Betico Croes mester a haci hopi sacrificio, drama sanger, sodor y lagrima pa realisa e anhelo di nos pueblo pa su libertad. Sin duda cu tabata e referendum di 25 maart 1977 y tambe e accionnan drastico di Augustus Scur 1977 cu a conduci cu Hulanda porfin a scucha e deseo di e pueblo Arubano. Den transcurso di henter e lucha, tabata partido MEP cu a percura pa nos simbolonan di union y libertad, esta nos himno y bandera, nos propio moneda, ortografia, Constitucion, Gobierno, Parlamento, Gobernador, Banco Central etc.

Logro di Status Aparte
Finalmente e deseo di Aruba a wordo cumpli durante e Conferencia di Mesa Rondo na Maart 1983 na unda nos derecho di autodeterminacion a ser reconoci pa nos sali for di Antiyas dia 1 di januari 1986 y cu nos lo bira independiente dia 1 di januari 1996 den un Man Comunidad cu Hulanda. Y dia 13 di juli 1990 ex-Premier Nelson Oduber a percura pa scrap e fecha di Independencia 1996 for di den Statuut, pero manteniendo e derecho pa bira independiente dia cu e pueblo aki den un referendum dicidi esaki den su mayoria cu aprobacion di 2/3 parti di Parlamento, cual ta un garantia solido y responsabel.

Awe cu MEP ta cumpli 47 aña, nos ta hopi orguyoso di tin un dama como lider y alaves e prome dama cu ta Minister President di pais Aruba, esta sra. Evelyn Wever-Croes. Alaves un gradicimento ta bay awe na lider fundador Betico Croes (dfm), lider honorario Nelson Oduber, lider actual Evelyn Wever-Croes, tur cu a yega di aparece riba lista, Conseho y Directiva, lidernan di bario, presidentenan, Forza Femenino Grace, HOT y votadornan cu a sostene MEP durante 47 aña largo. MEP semper di pueblo, cu pueblo y pa pueblo. Pabien!

Comments

comments

C: Heineken
new india