Diadomingo, dia 20 di November, nos ta celebra “Dia di Mucha” na Aruba. Riba e dia aki tambe ta celebra “Dia International Di Derecho Di Mucha”. Pa e motibo aki directiva di Centro di Bario Playa Pabao ta duna reconocemento na nos muchanan den un solo actividad na Playa Pabao. E actividad aki ta tuma lugar diabierna dia 18 di November y ta cuminsa pa 3’or di merdia y lo termina pa 8‘or di anochi. Nos muchanan tin oportunidad pa hunga den “waterslide”, bula riba trampolin y den dinojump, hunga den luchtkasteel, monster truck, pinta cara y participa na diferente wega. Tambe muchanan tin oportunidad pa gana un celular. Tur esaki sin costa mayornan ni un cen preto. Muchanan ta wordo invita pa bin cu nan trahe di baño pasobra ta bay tin un “waterslide”. Pa 6’or lo cuminsa cu un show “Di Mucha Pa Mucha” cu presentacion di gruponan hubenil di baile, Kids 2 Kids, Chaz Dancers, Candilicious Dancers y Pierewietje. Y tambe lo tin presentacion di e solista hubenil Rakesh Persaud. Pa 3’or lo tin pustamentonan di e auto chikitonan (hotwheels). Pues muchanan bin tempran pa inscribi y bo auto tambe ta participa na e caredanan. E prome 400 mucha lo ricibi un recuerdo di e dia aki. Pues diabierna dia 18 di November ta celebra Dia di Mucha y ban duna nos muchanan reconocimento riba e dia importante aki y laga nos manera un famia grandi asisti na e actividad aki cu nos muchanan na Centro di Bario Playa Pabao. Pues mayornan nos ta warda boso y bin compaña bo yiu(nan) na e actividad aki. Lo tin un bar (sin bebida alcoholico) y un cushina cu prijsnan di dia di mucha. Un danki di curason ta bay na Vertegenwoordig van Nederland na Aruba, CEDE-Aruba y Asociacion pa Trabou Hubenil Arubano pa nan contribucion na e actividad aki.