Recientemente e Blue Energy Committee na Hilton Aruba Caribbean Resort & Casino a organisa un celebracion di plantacion, un dia di aprecio na unda departamentonan a intercambia diferente planta y tarhetanan cu mensahenan pa otro. E iniciativa aki a trece alegria y entusiasmo na pia di trabao mirando tambe cu mayoria miembro di team ta hardinero den nan curason.
E departamento di ingenieria a inicia e actividad por medio di premia un mata na Food & Beverage kende despues a haci e mesun cos pa Front Office, kende na su turno a haci mesun cos pa departamento di cushina. Cada departamento a sigui cu e cadena di comparti, reflehando un simbolo di crecemento y bida na henter e resort for di Purchasing & Accounting te na Security, Commercial , Housekeeping, Recreation, Spa, Executive office, terminando na Engineering, asina completando henter e circulo di comparti cu otro.
Mientras cu no ta tur hende ta bendiciona di por tin e ‘green thumb’ pues di por maneha cu matanan, amantenan di mata tabata super contento cu e intercambio di regalo aki, cu un aprecio grandi na e gratitud expresa na cada departamento agregando luz y un ambiente caluroso na cada area.
Departamento di ingenieria a remarca cu plantanan cu ta facil pa cuida a wordo selecta, y mirando cu tur departamento a wordo inclui, ningun hende tabata tin envidia!