Diadomingo awo, Koningin Wilhelmina Kankerfonds lo bay tene su rifa. Presidente di e fundacion, Lily Prins, a splica cu rifa lo tuma luga pa 7’or y 45 di anochi na Tele Aruba. Te cu awor aki no por keha, como directiva di Wilhelminafonds cu e benta di rifa y sa cu e premionan ta hopi atractivo, pasobra ta papia di un prome premio di un Chevrolet Sonic 2016 full ekipa y tin e di dos premio cu ta dos ticket pa Hulanda, ofreci pa KLM. E di tres premio ta un Mistery Travel pa Maduro Travel y despues ta haya e di cuater premio cu ta un Gift Certificate di Setar di 1000 florin. Sigui pa un Money Card di CMB di Compa Leon, tambe di 1000 florin y tin un Gift Certificate di Superfood di 1000 florin. Despues tin un rond trip pa Medellin, Colombia, cu Insel Air y un rondtrip pa Republicana Dominicana, tambe cu Insel Air. E di nuebe premio ta un premio obsekia door di Boolchand’s cu ta un holoshi. E ta pa hende homber of hende muhe TW y e ultimo premio ta un Gift Certificate di Ling & Sons di 200 florin.
Esakinan ta e premionan atractivo. E ticket ta costa solamente 25 florin. Tur e ingresonan aki ta pa yuda Wilhelminafonds. E premionan aki tin nan y ta haci e rifa aki asina atractivo pasobra KWF no ta haya ningun sorto di subsidio. Como directiva ta percura anualmente pa recauda e fondo pa sigui yuda tur esnan cu ta bati na nan porta.
E aña aki e costonan tabata halto y esey ta e motibo pakico ta organia e rifa aki, pa por haya entrada y pa por cuminsa cu 2017 tambe.
E ayudo ta keda pa e comunidad cu ta bati na porta pa yudansa. Lo bay tin boluntarionan cu lo para canto di caminda desde di 4’or di atardi awe banda di Stern, caminda cu durante e ultimo simannan aki diasabra a para pa bende rifa y na oficina di KWF lo bay tin hende continuamente cu tambe por cumpra riba y diasabra lo bay tey henter dia na KWF pa bende riba. KWF ta hopi gradicido pasobra danki na Dios, danki na comunidad Arubano, cu e Fundacion aki ta sigui existi. Dia 4 di Februari 2017 ta existi 56 aña y esaki ta duna KWF e empuhe pa sigui pasobra semper Prins ta bisa, tanten cu e malesa aki no bati na bo porta, bo no sa di dje. Pero ora cu e yega, bo sa cu KWF su portanan ta habri pa un y tur cu confronta e malesa aki. Bo kier un conseho, KWF tey. Bo kier un guia, KWF tey. Bo kier un yudansa, KWF tey. Gradici Dios y gradici e comunidad Arubano cu KWF tey pa yuda cada un.