E Fundraising aki lo tuma luga pa 9 or y 30 di mainta cu’n koffiemorgen cu dushi bolo y un bon koffie of juice pa cuminsa e mainta. Lo sigui un festival di soppi. Lo tin diferente sopi, entre otro, sopi carni, sopi galiña, sopi di oester y erwtensoep cu no por keda afo ariba e dia aki.
Tambe lo bay tin benta di snackbox cu diferente snacks masha dushi mes. Pa merdia 12 or lo bay tin benta di cuminda crioyo, cu bon sabor manera nos hendenan ta gusta.
Mainta trempan pa 9 or di mainta lo cuminsa cu’n wega di futbol di nos babynan di La Fama cu ta e mini nan y e ta cay den categoria di U5. Dus mucha bou di 5 aña cu lo hunga un wega amistoso contra un otro ekipo. Nos babynan ta masha excita mes pa hunga y mustra tur hendenan ‘futbol skills’.
Pa 10 or nos lo tin pa prome biaha riba veld di La Fama, un show di Kustwacht, cual semper a sa di trece bon show pa pueblo di Aruba.
Pa 11 or nos lo bay tin show di K9 Unit, cu tambe ta priminti di bira un show pa presencia.
Despues di e show di K9 Unit lo bay tin spel zonder grenzen pa mucha di diferente edad, cu bunita premio. Weganan cu lo bay organisa ta entre otro comemento di Donuts, Cookierace (e cookie mester baha di e frenta di un mucha y bay den su boca sin cu e mucha mishi cu esaki su man), “magic mucha tin un cabuya mara na su heup y na e cabuya tin un clabo y mester purba na hinca esaki den un boter, etc. etc.
Pa 3 or y 30 lo bay tin un tremendo wega di futbol di damas, den e categoria di U15. Esaki lo bira nan prome wega riba veld di La Fama, caminda nan lo bay mustra kico nan tin aden.
Pa 4 or y 30 lo bay tin un show di baile.
Pa 5 or y 30 lo bay tin e famoso competencia di Palo di Ceba, cu premio atractivo.
Pa 6 or y 30 lo bay tin un bunita show di cabaynan paso fino bou guia di Robert Ras y Vanny Coffie di Rancho El Paraiso. Tambe lo ta presente Rancho Las Piedras, Rancho Monte Azul, Villa Florallina, Rancho Paso Fino, Rancho Cornes, Rancho Fredlin Boekhoudt
Rancho Beto Haaien, Rancho Milton Thijsen, Rancho El Paraiso.
Un Danki na Tur Rancho cu a coopera pa cu evento y un danki na tur cabayista. Melanie Wever tambe lo t’ey.
Y por ultimo, e main event cual lo ta e famoso competencia di balansamento di auto. Cu lo ta pa prome biaha ariba veld di La Fama, danki na Sr. Joy Werleman, di Don Flip Racing Team.
Cuminsando for di 1 or lo tin dushi musica na encargo di e famoso y conocido Dj Pitufo,cu lo deleita tur esunnan presente cu su tremendo variacion musical. MC pa e dia grandi aki lo ta Sr. Noli Martinus.
Bar y cushina lo ta bon surti y nos ta spera pueblo di Aruba den grandi riba e dia ki riba veld di La Fama.