SIMAR lo tene un anochi di informacion pa su miembronan dia 25 di April proximo. Sra. Sheila Tromp di sindicato SIMAR ta splica mas ariba esaki.
Ta invita tur miembro di SIMAR pa ta presente pa asina conhuntamente mester tuma e decisionnan. E fecha aki na e reunion lo presenta e presupuesto y duna relato tambe regardando e presupuesto.
SIMAR ta contento ya cu tin hopi hende cu kier sigui mira cambio den SIMAR y esakinan tambe ta wordo invita. Tin dos puesto vacante pa miembro di directiva y nan ta wordo invita pa ta miembro di directiva y asina hunto traha pa bienestar di e maestronan.
E directiva actual tin un aña mas pa bay y awor tin luga habri pa 2 comisario. Esun cu ta interesa pa forma parti di directiva por bin oficina di SIMAR, caminda lo tuma contacto cu nan y e anochi di informacion, presenta nan mes, pa wordo someti na votacion.
Pa loke ta docentenan cu no ta miembro ainda, pero cu a ripara si cu cada biaha cu tin un problema, e ora ta haya e maestronan aki na SIMAR. Pero Sra. Tromp a enfatiza cu SIMAR ta habri pa tur hende, y cu e directiva ta consisti di 5 persona so, cu tambe tin nan trabaonan normal na scolnan.
Ultimo nan tabata tin reunion cu studiantenan di ultimo aña di IPA, y mester bisa cu nan tabata tin hopi interes y algun a bira miembro. Tambe tabata tin otronan cu ta dispuesto pa yuda unda cu nan por. Mester bisa cu e studiantenan aki no tin hopi informacion encuanto e trabao di un sindicato y despues cu nan a haya e informacionnan necesario, mester bisa cu nan ta balora e trabao di un sindicato.
Pa finalisa, Sra. Sheila Tromp a invita tur miembro di SIMAR pa asisti na e reunion dia 27 di April, pa 7 or di anochi, na edificio di SIMAR.