Dia 22 di mei tin espacio pa keur tur vehiculo di Operadornan di Tour

Dienst Technische Inspectie (DTI) ta den preparacion pa reapertura di turismo crucero cu ta inicia den luna di juni. Den cuadro di esaki a pone un fecha special pa tour operatornan por acudi cu e nan vehiculonan y haya keuring.

Manera ta conoci, algun tempo atras Minister di Turismo Dangui Oduber a anuncia cu den luna di juni Aruba ta bay cuminsa ricibi su prome barconan crucero cu ta sali di un homeport den Caribe mes, ya cu esnan di Merca no a haya aprobacion ainda pa cuminsa cu nan biahenan.

Debi na e situacion menciona, DTI, hunto cu su partnernan manera Departamento di Transporte Publico (DTP) , DIMP, DVG, y Taskforce, bou coordinacion di ATA cu ta encarga pa duna e seyo di aprobacion, ta haciendo e preparacionnan.  Richella Dorothal, directora di DTI, a splica cu cu a habri un oportunidad pa operadornan di tour keur den forma masalmente riba diasabra, 22 di mei. Taxistanan ya caba a pasa den e proceso aki y ta cla.

Dorothal a recorda cu ya caba nan por cuminsa pasa na DTI pa haci un cita pa keur riba diasabra, 22 di mei. Riba e dia en cuestion mes no por acudi sin cita. DTI ta hopi druk y no tin cita prome cu juni.

Aworaki ta den proceso pa keurmento di autonan di huur y otro vehiculonan manera UTV y ATV. E ultimonan aki si mester haci adaptacion riba e auto, nan ta haya 30 dia haci e trabou y haya nan keur final.

El a mustra cu ta masha importante pa tur vehiculo ta den bon estado y cu e aprobacionnan pa subi caminda. DTI ta haci su controlnan tambe pa mira cu e vehiculonan aki a pasa e keuring na e departamento.

 

 

Comments

comments