Tur hende mester sa caba cu pa dia 2 di juli e plachi number lo mester ta completamente paga. Sra. Luenne Gomez Directora di Departamento di Impuesto ta amplia.
Sra. Luenne Gomes kier a corda comunidad cu e ley di impuesto di vehiculo di motor a wordo ahusta na januari 2017 unda cu e pago di en bes di kwartaal ta wordo realisa den dos pago so pa aña. E prome dos kwartaalnan mester wordo paga prome cu fin di januari anto e di tres cu cuater prome cu fin di Juni.
Ta acercando fin di Juni caminda cu dia 30 ta cay riba un diasabra y consecuentemente despues di dialuna 2 di juli, tur cliente cu vehiculo di motor riba careteranan Aruba mester tin nan belasting of impuesto di vehiculo di motor ta paga.
A tuma diferente accion hunto cu polis unda cu a wordo controla no solamente seguro pero tambe impuesto unda hasta tabata tin un caso unda e auto a wordo tuma den beslag y bay cun’e.
Kier reitera ora cu tin un auto pa transporte di henter famia, mester cumpli cu e deber cu impuesto y seguro paga. Esaki nan tur ta gastonan cu ta bin acerca, pero ta cosnan importante, pasobra ora tin un accidente di auto fatal y no tin seguro pa cover e gastonan ey e ora ta bay trece un problema hopi mas grandi cu no ta premira.
P’esey mester wak pa tin tur cos na ordo y paga pa no wordo haya cu consecuencianan fastioso, unda cu control por tuma luga y nan ta bay cu e auto y no ni por yega tempo na trabou y lo keda cana canto di caminda.
Tin di pensa pa haya un forma pa obliga e cliente pa realisa cu e pago obligatorio anual, y ta bezig cu companianan di seguro. Ta wak con por conecta e sistema di belasting, hunto cu e companianan di seguro hunto cu polis y DTI, tur hunto ya cu awendia tin e tecnologia y tur cos ta posibel.
Naturalmente pero mester haci un inversion riba e tereno aki, pa wak con lo por bin cu conexion pa mustra informacion entre compania di seguro,DTI y polis por haya e informacion caminda cu Minister Bikker a papia di bin cu un chip.
Den todo caso e no ta bay tur e informacion di e cliente, sino ta bay wordo traha den un forma cu ta bay mustra esun necesario pa haya sa si e cliente tin debe di impuesto si of no y no ta bay sali adres, ni cu ken ta casa of kico ta su ingresonan, etc pasobra esey ta keda informacion priva.
Esaki ta tumando luga cu KPA caba cu un lista cu ta hayando den forma regular for di departamento di impuesto e lista di numbernan di auto cu no ta paga pa por tin mas control. Den futuro ta bay over cu’n sistema mas automatisa y por mira na realtime tur e informacion, pa asina por elimina e number plachi of sticker.
Ta papiando di mei miyon florin riba e presupuesto di gobierno den plachi number tur aña esaki mester ta creativo. Si por baha gasto y bira mas eficiente, lo mester bay riba e direccion aki pa yuda baha e gastonan, segun Sra. Luenne Gomes, directora di Departamento di Impuesto.