Sr. Randy Maduro ta splica cu despues di un tempo largo sin tin e mercado di Santa Rosa lo cuminsa back dia 2 di April na tereno di Santa Rosa mes pa cual e aña aki esaki lo ta uno grandi cu hopi ambiente.
Hopi hende a yama Santa Rosa pa puntra ki dia nan lo tin nan mercado y e motibo pa cual a tuma asina tempo ta cu ta masha poco Santa Rosa ta organisa un mercado den temporada di Carnaval ya cu e tentnan tambe ta wordo uza. E prome mercado pa e aña aki, lo ta diadomingo dia 2 di April cu lo ta completamente bon carga, bon cu tur cos bon hinca den otro, pa asina e pueblo di Aruba por yega Santa Rosa, for di 9 or di mainta, te cu 3 or di atardi.
Lo bay tin fruta y berdura, carni fresco, cuminda crioyo. Lo bay tin ambiente pa muchanan y tambe pa hende grandi. Pa prome biaha lo tin un ambiente musical, cu lo ta den man di Tipico Kadushi Largo.
Sr. Maduro ta haci un apelacion pa tur esunnan cu lo bin pa pone nan producto, pa wordo poni pa wordo ofreci na e comunidad, pa ta na tempo pa asina e actividad por cuminsa na tempo y tur cos cana netchi den dia.
Damnan ta yen y esey kiermen cu hendenan a planta. Santa Rosa a haya productonan fresco pa asina nan por brinda na nan mercado. Hopi di nos agricultornan a planta maishi rabo, esey tambe Sr. Maduro a spera cu esey tambe lo wordo ofreci diadomingo awo.
Esakii ta e miho temporada pa cuminsa planta, awo cu tin awa disponibel y e molinanan di pos di awa dushi ta disponibel, segun Sr. Randy Maduro di Santa Rosa.