Mundialmente ta celebra dia 17 di Mei como e ‘Dia di Presion Halto’. Den cuadro di esaki ta comparti siguiente informacion riba presion halto.
Na Aruba 1 den cada 2 hende homber (25–64 aña) y 1 den cada 3 hende muher (25-64 aña) tin un presion halto (STEPS, 2006). Un gran cantidad di e personanan aki no sa cu nan tin un presion halto. Pa e motibo aki ta sumamente importante pa controla bo presion di sanger riba base regular. Specialmente si bo tin familiar cu ta sufri di e condicion aki. Por haci esaki cerca bo dokter di cas, riba e Bus di Salud y na cierto boticanan cu ta duna e servicio aki.
No tin un solo causa pa presion halto, sinembargo tin hopi factor cu ta contribui na su desaroyo.
Por ehempel e factornan hereditario, sexo y edad. Un persona cu den famia tin presion halto mas lihe lo desaroy’e tambe. Hende homber ta core mas riesgo pa desaroya presion halto compara cu hende muhe. Mas e edad subi mas chens tin pa desaroya problema cu presion halto. Esakinan ta factornan cu nos mes no tin den nos man y ta imposibel pa tin un influencia riba nan.
Un factor cu si nos tin den nos man ta nos estilo di bida. Comemento di cuminda cu ta contene un cantidad halto di salo/sodium por subi e presion den sanger. Mescos ta conta pa bebemento di alcohol y humamento di sigaria cu ta subi e presion y ta haci daño na curason, arteria y adernan. Presion den sanger ta subi tambe den situacion continuo di tension (stress), preocupacion (worry) of ansiedad. Peso di mas por subi bo presion den sanger. Pa e motibo aki ta hopi importante pa yega y mantene un peso saludabel.
Pa mas informacion por tuma contacto cu IBiSA na 5824987 of via email ibisa.aruba @gmail.com of busca nos via Facebook