E network global di liñanan telefonico pa ayudo di mucha ta marca e Dia Internacional di Ayudo Telefonico pa Mucha, cual ta dia 17 di Mei, door di pidi atencion di gobiernonan pa implementa e Metanan Sostenibel di Desaroyo (Sustainable Development Goals (SDGs), en particular urgentemente pa termina tur forma di violencia en contra di mucha, manera meta 16.2 y metanan relaciona, obliga Estadonan cu ta Miembro pa “termina abuso, explotacion, traficacion y tur otro forma di violencia of tortura contra di mucha”, incluyendo bullying, violencia fisico y sexual, violencia mental y abuso psicologico, y negligencia of trato di negligente.
KIKO TA UN LIÑA DI AYUDO TELEFONICO PA MUCHA?
E liña di ayudo telefonico pa mucha, ta contempla e derecho fundamental di mucha pa wordo scucha. Nan ta ofrece sosten y guía na muchanan cu, dia tras dia, ta experiencia violencia, abuso y discriminacion, y no tin ningun otro hende pa nan acudi pa ayudo. Nan ta representa e forma mas acesibel y confiabel pa un mucha por haya ayudo.
Na Aruba, muchanan por tuma contacto cu nan liña di ayudo pa mucha, Telefon pa Hubentud Aruba, na diferente forma: via un telefon, of pa medio di tecnologia online, manera Smartphone y Tablet. Globalmente tin momentonan y circunstancianan cu muchanan no tin e posibilidad pa bini den contacto cu e liña di ayudo telefonico pa mucha. Por ehempel ora cu nan ta biba ariba caya of den un area cu posibilidadnan marginal. Den e casonan aki, e liña di ayudo telefonico pa mucha ta hasi nan máximo esfuerso pa alcansa nan y brinda nan e sostén cu nan mester.
E personanan mas indica cu por haci un diferencia den e bida di hendenan hoben cu problema, ta e personanan cu ta scucha tur dia, nan storianan emocionante. Door di scucha empaticamente, e ayudantenan di e liña di ayudo telefonico pa mucha, ta guía e muchanan pa yega na e recursonan y asistencia cu nan tin mester. Nan ta conseha, informa y duna sosten na muchanan hoben, te na e punto cu e mucha mes ta cla pa tuma decision pa accion of reacción. Sin nan trabao critico, muchanan lo keda sin wordo sucha. Telefon pa Hubentud Aruba desde 1999 ta ehecutando e trabao aki hunto cu nos 30 boluntarionan.
ALGO TOCANTE DI CHILD HELPLINE INTERNATIONAL (red Internacional di Ayudo Telefonico pa Mucha)
Child Helpline International, ta un di e organisacionan colectivo cu ta mas impactante na mundo. E organisacion aki ta trece mas di 181 liñanan di ayudo telefonico pa mucha den 142 pais hunto, y ta acumula miyones di contactonan di mucha y hobennan cu mester di ayudo y guía. Te na e momento cu el a wordo funda na 2003, e miembronan tabata eherce nan trabao den isolacion, cu poco influencia, y ningún acceso na otro of esnan na poder. Child Helpline International ta transformando esaki!
Telefon pa Hubentud Aruba ta miembro di Child Helpline Int’l, desde cu e organizacion aki a wordo funda na 2003, y a representa pa mas cu 9 aña e region Las Americas y el Caribe den e Board di Child Helpline International.
Child Helpline Int’l ta apoya creacion nobo di liñanan telefonico pa yuda mucha y ta fortifica e network door di comparti locual e organización aki ta siña for di e mihor lineanan, cu tur otro lineanan. CHI tambe ta colecta y interpreta informacion (data) di tur nos miembronan di Child Helpline Int’l. E miyon di storianan individual ta forma un mosaico di con y unda den mundo, mucha y hoben ta sufriendo inhusticia, abuso y peliger. CHI ta presenta e storianan aki na esnan cu influencia politico (beleidsmakers) pa efectua cambionan pa mehora e condicionnan pa mucha, ambos riba nivel global y local.
Cada mucha tin un boz. E mision di e liña di Ayudo Telefonico pa Mucha ta pa laga nan boznan wordo scucha, respeta y pa tuma accion, paso solamente ora cu un mucha ta wordo scucha, e ta wordo fortifica pa participa den sociedad y contempla su potencial.
Dia 17 di Mei, Dia di e liña di Ayudo Telefonico pa Mucha (Child Helpline Day),
Telefon pa Hubentud Aruba ta hasi referencia na e Declaracion di Bangkok, aproba pa e Asamblea General di Ayudo Telefonico pa Mucha, cu a reuni na Bangkok (Thailandia)
ariba 16 di November 2016 pa e di Ocho Consulta Internacional di Child Helpline Int’l.
Puntonan Cardinal
· Ayudo telefonico pa mucha ta opera den 142 pais y ta sostene e derecho di mucha pa proteccion contra di violencia.
· Na aña 2015 e lineanan di ayudo telefonico pa mucha a contesta casi 20 miyon di contacto cu muchanan y hobennan mundialmente.
· Un, for di shete contacto, tabata concerni abuso y violencia.
· Muchanan den areanan di disaster y zonanan di conflict ta hiba un riesgo special.
· Violencia basa ariba e genero (gender) ta causa diferente forma di violencia contra di mucha.
· E liña di Ayudo Telefonico pa Mucha ta scucha, conseha, referi y asisti y provee otro servicionan esencial pa muchanan den necesidad.
Gobiernonan mester:
· Sigura cu cada mucha den tur pais tin informacion y acceso na un linea di ayudo telefonico pa mucha, cu ta di un calidad halto, pa asina mucha cu ta wordo exponi na abuso y violencia por wordo asisti y contesta.
· Adapta provisionan legal y apropia, pa exclui tur forma di violencia contra di mucha y prove suficiente recursonan pa hiba e violadornan di esaki dilanti justicia.
· Uzando e boznan di e muchanan, incluyendo e informacion (data) di e liña di Ayudo Telefonico pa Mucha, pa avansa implementacion di e derechonan di mucha den e plan di proteccion nacional pa mucha.
· Implementa e meta 16.2 di e Metanan Sostenibel di Desaroyo: “Pa termina abuso, explotacion, traficacion y tur forma di violencia contra y tortura di mucha” den tur ambiente, incluyendo hogarnan, famianan, scol y institucionan, den comunidad y lugarnan publico.
Nos ta haci un yamada na gobierno y tambe na tur nos partnernan den Sociedad Civil, agencianan internacional y e sector priva, incluyendo medionan di comunicacion y otro partnernan industrial, pa:
· Reconoce y comunica cu ningun violencia contra di mucha ta justifica;
· Duna apoyo na e sostenibilidad di ayudo pa mucha door di prove recursonan adecua pa sigura Telefon pa Hubentud Aruba su habilidad pa por sigui opera;
· Reconoce e capacidad di Telefon pa Hubentud Aruba pa hiba e boz di e muchanan serca e publico pa enfatisa e situacion di e muchanan someti na bullying y violencia.