Manera cu DIP a bin ta anuncia for di januari, nan lo bay ta mas estricto pa cu e controlnan y otorgamento di kavel. Esaki a sosode caba, esunnan cu tin e permiso den nan poder, nan sa cu ya tin hende cu a pone trailer den Vondellaan, cu tabata permiti desde 9 di februari.
Sr. Ronnie Maduro, di DIP, a splica cu solamente esun cu tin permiso mag di pone trailer, stellage, of trailer of flatbed. L.G. Smith Boulevard, DOW lo instala tent pero a bin tuma nota for di januari caba cu tin hende a uza tape of spuitbus, cabuya, bloki pero niun di esakinan no ta permiti. A sincronisa cu KPA den e caso aki, mescos cu DIP a saca un comunicado di prensa, bisando cu e obhetonan aki no ta conforme e permiso y ta pidi pa kita esakinan.
Si encaso ora di controla, prome cu parada, DIP mes ta kita esakinan. Ta pidi atencion na tur hende, pa kita tur cos cu no tin permiso. Tambe tin tentnan mei mei di kavelnan. Si e no ta kavel cu a haya permiso, te cu dia 17 di februari, esta diadomingo, pa 12 or anochi en adelante. For di e momento ey, por pone banki of stoel, no prome cu esaki.
Diasabra lo tene un control y obhetonan no autorisa, lo wordo kita for di e sitio. Mirando cu ta diferente compara cu otro añanan, ta bolbe recorda e pueblo cu dilanti Talk of the Town, tin kavel, pa cual hende a paga pa nan. Diferencia ta cu e tentnan di DOW no ta cuminsa eynan, pero un tiki mas pabao di Talk of The Town, net prome cu ATA. Pero esey no kiermen cu e kavelnan dilanti Talk of The Town ta publico. Pues, doñonan di e kavelnan no ta obliga di pone nada ainda.
Si cualke persona cu kisas door di uza spuitbus ta un espacio pa haci uzo di esaki, esey sigur no ta e caso, segun Sr. Ronnie Maduro di DIP. Si e doño yega diadomingo pa wak parada, e tin derecho di hal’e of yama polis. Semper mester tene cuenta di cierto espacio cu ta delinea e permiso. Pero pa evita confrontacion, pasobra cu un ta bay pusta boca cu otro, tin hende cu tin permiso para dilanti Talk of the Town full. Esey ta e diferencia mas grandi, pero ta urgi pueblo pa tene cuenta cu esaki. Tur esakinan ta bay wordo kita, niun hende tin derecho di pone algo eynan, cu no ta esunnan cu a paga pa e kavel en cuestion.